(ព្រះសីហនុ)៖ លោកឧត្តមសេនីយ៍ត្រី ស៊ុន សុផាត ស្នងការរងទទួលផែនប្រឆាំងបទល្មើស បានឲ្យដឹងថាៈ ដោយទទួលបានការអនុញ្ញាតពីលោក យន្ត មីន អភិបាលខេត្តព្រះសីហនុ និងការណែនាំរបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅវេលាថ្ងៃត្រង់ ថ្ងៃទី៧ ខែកញ្ញា ឆ្នាំ២០១៨ កម្លាំងនគរបាលខេត្តព្រះសីហនុ ដឹកនាំដោយលោកវរសេនីយ៍ទោ សួស សីលា នាយការិយាល័យនគរបាលប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលស្រុកព្រៃនប់ បានចុះត្រួតពិនិត្យ អ្នកបើករថយន្ដធុនធ្ងន់ដឹកកុងតឺន័រ នៅតាមបណ្ដោយផ្លូវជាតិលេខ៤ ភូមិអូរចំណារ ឃុំអូរឧកញ្ញ៉ាហេង ស្រុកព្រៃនប់ ខេត្តព្រះសីហនុ ដើម្បីធ្វើតេស្តទឹកនោមរកមើលសារធាតុញៀន។
លោកឧត្តមសេនីយ៍ស្នងការរងបានបញ្ជាក់ថា ជាលទ្ធផលបានត្រួតពិនិត្យធ្វើតេស្ត តៃកុងឡានចំនួន ១២៨នាក់ លទ្ធផលវិជ្ជមានចំនួន ១២នាក់។
លោកឧត្តមសេនីយ៍ស្នងការរង ក៏បានអោយដឹងដែរថា ចំពោះអ្នកមានផ្ទុកសារធាតុញៀនទាំង១២នាក់នេះ សមត្ថកិច្ចបានធ្វើការអប់រំ និងធ្វើកិច្ចសន្យាឲ្យបញ្ឈប់ការប្រើប្រាស់សារធាតុញៀន ដែលតំរូវអោយម្ចាស់ក្រុមហ៊ុនមកធានា ៕
