(ព្រះសីហនុ)៖ កំណាត់ផ្លូវក្រាលគ្រួសក្រហមដ៏សំខាន់ភ្ជាប់ពីផ្លូវជាតិលេខ៤ចូលមកកណ្តាលក្រុងព្រះសីហនុនឹងត្រូវចាក់បេតុងវិញដើម្បីសំរួលការធ្វើចរាចរណ៍អោយប្រសើរឡើងរបស់អ្នកធ្វើដំណើរទាំងឡាយដែលមានបំណងចូលមកក្រុងព្រះសីហនុដោយបានកាត់បន្ថយពេលវេលា និងងាយស្រួលកាត់បន្ថយគ្រោះថ្នាក់ចរាចរណ៍ផងដែរ ។
លោក ជាម ហ៊ីម ប្រធានក្រុមប្រឹក្សាខេត្ត និងលោកយន្ត មីន អភិបាលខេត្តព្រះសីហនុ ព្រមទាំងមន្ត្រីជំនាញ រួមទាំងអាជ្ញាធរមូលដ្ឋាន នៅរសៀលថ្ងៃអង្គារទី១១ ខែកញ្ញា ឆ្នាំ២០១៨ បានចុះពិនិត្យមើលស្ថានភាពផ្លូវដីក្រហមមួយខ្សែរបែកពីផ្លូវជាតិលេខ៤ត្រង់ចំណុចស្ថានីយ៍ប្រេងឥន្ធនៈតូតាល់ឃ្លាំងលើ ស្ថិតក្នុងសង្កាត់លេខ១ ភ្ជាប់ផ្លូវមិត្តភាព មុខសាលាក្រុងព្រះសីហនុ ដោយគ្រោងប្រែក្លាយផ្លូវដីក្រហមមួយខ្សែនេះអោយទៅជាផ្លូវបេតុងក្នុងពេលដ៏ឆាប់ខាងមុខនេះ ដែលជាជំនួយសប្បុរសជនគ្រោងចំណាយ ប្រមាណជិតកន្លះលានដុល្លារអាមេរិច ។
លោក យន្ត មីន មានប្រសាសន៍ថា ឆ្លើយតបចំពោះស្ថានភាពចរាចរណ៍នៅខេត្តព្រះសីហនុមានភាពមមាញឹកខ្លាំង ដោយសារលទ្ធផលនៃការអភិវឌ្ឍរយៈពេលពីរឆ្នាំចុងក្រោយនេះ និងកំណើនយានយន្ត បានកើនឡើងខ្លាំងស្ទើរមិននឹកស្មានដល់ រដ្ឋបាលខេត្តត្រូវតែគិតគូជាចាំបាច់ក្នុងការកែលម្អផ្លូវអោយបានប្រសើរដើម្បីសម្រួលចរាចរអោយបានកាន់តែប្រសើរថែមទៀត។
លោក យន្ត មីន និងលោក ជាម ហ៊ីម ប្រធានក្រុមប្រឹក្សាខេត្តព្រះសីហនុ បានថ្លែងអំណរគុណចំពោះសប្បុរសជនដែលបានចូលរួមជារមួយរដ្ឋបាលខេត្តក្នុងកាស្ថាបនាផ្លូវជូនពលរដ្ឋបានប្រើប្រាស់។
លោក ណុប ហេង ប្រធានមន្ទីរសាធារណៈការ និងដឹកជញ្ជូនខេត្តព្រះសីហនុ បានអោយដឹងថាផ្លូវនេះមានលេខ៨២៣ បែកចេញពីផ្លូវជាតលេខ៤ ត្រង់ចំណុចស្ថានីយ៍ប្រេងឥន្ទនៈតូតាល់ឃ្លាំងលើស្ថិតក្នុងសង្កាត់លេខ១ ភ្ជាប់មកផ្លូវមិត្តភាព មុខសាលាក្រុងព្រះសីហនុ មានប្រវែង ១,៧២៥ម ។ ផ្លូវនេះគ្រោងនឹងចាក់ថែមប្រវែង ១,៤១៤ម ទទឹង ៨,២ម កំរាស់២តឹក ប្រើឆ្អឹងដែក១២ លី ពីរជាន់ ដោយគ្រោងចំណាយទឹកប្រាក់ប្រមាណ ៤០ម៉ឺន ដុល្លារអាមេរិច ជាអំណោយរបស់លោក គុយ ណាត ៕
