(ព្រះសីហនុ)៖ នៅព្រឹកព្រលឹម ថ្ងៃទី១១ ខែតុលា ឆ្នាំ២០១៨នេះ នៅវេទិការ ៧មករា ក្រុងព្រះសីហនុ ប្រជាពលរដ្ឋប្រមាណជាង ៤០០នាក់ បានធ្វើដំណើរតាមរយៈរថយន្តក្រុងមិនគិតប្រាក់ចំនួន ១០គ្រឿង ទៅកាន់កន្លែងធ្វើការ លំនៅដ្ឋាន ប្រកបរបរអាជីវកម្មវិញ ក្រោយពេលដែលបានមកដល់ខេត្តព្រះសីហនុ នាឱកាសបុណ្យភ្ញុំបិណ្ទនេះ ។
តាមរយៈរថយន្តក្រុងដែលសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាអោយអាជ្ញាធររៀបចំជូនប្រជាពលរដ្ឋធ្វើដំណើរមិនគិតប្រាក់ក្នុងពិធីបុណ្យភ្ជុំបិណ្ឌនេះ ។
មុនពេលរថយន្តចេញដំណើរលោក យន្ត មីន អភិបាលខេត្តព្រះសីហនុ បានអញ្ជើញមកជួបសំណេះសំណាល ជូនដំណើរពលរដ្ឋដែលធ្វើដំណើរត្រឡប់ចេញពីខេត្តព្រះសីហនុវិញ និងសាកសួរសុខទុក្ខលើកទឹកចិត្តដល់បងប្អូនអ្នកបើកបរ រថយន្តក្រុងទាំង១០គ្រឿងផងដែរ ។ មន្ត្រីសាលាខេត្តព្រះសីហនុថ្លែងថា នៅព្រឹកនេះជាដំណើរដឹកជញ្ជូនចេញពីក្រុងព្រះសីហនុចុងក្រោយ មិនមានសម្រាប់ពេលរសៀលទៀតទេ ៕
