(ព្រះសីហនុ)៖ ម៉ូតូប្រដេញចំនួនបីគ្រឿងជាអំណោយរបស់លោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិត្រូវបានលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុប្រគល់ជូនមន្ត្រីនគរបាលប្រចាំការនៅស្នាក់ការសន្តិសុខ (P១២) ស្ថិតនៅតំបន់ឆ្នេរសមុទ្រអូរត្រេះចាស់ ក្នុងសង្កាត់លេខ៤ ក្រុងព្រះសីហនុ ទុកសំរាប់ប្រើប្រាស់ក្នុងការបង្ក្រាបនូវបទល្មើសផ្សេងៗនាព្រឹកថ្ងៃទី១៦ ខែតុលា ឆ្នាំ២០១៨នេះខណៈពេលដែលលោកឧត្តមសេនីយ៍ស្នងការអញ្ជើញចូលរួម ពិធីប្រកាសប្រគល់ភារកិច្ច និង ធ្វើពិធីប្រគល់ទទួលប៉ុស្តិ៍ការពារសុវត្ថិភាព ។
បើតាមឧត្តមសេនីយ៍ស្នងការបានអោយដឹងថា ការបង្កើតប៉ុស្តិ៍ការពារសុវត្ថិភាពមួយនេះនឹងដាក់កម្លាំងនគរបាលចំនួន ១២នាក់ បែងចែកវេនប្រចាំការ ២៤ម៉ោង លើ២៤ម៉ោង ដោយមានភារកិច្ច ការពារសុវត្ថិភាពជូនប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិ ព្រមទាំងអ្នកវិនិយោគបរទេស ។
លោកឧត្តមសេនីយ៍ទោ ជួន ណារិន្ទ មានប្រសាសន៍ផ្តាំផ្ញើ ឲ្យកងកម្លាំងទាំងអស់ត្រូវយកចិត្តទុកដាក់ បំពេញការងារអោយបានល្អ ហើយក៍បានថ្លែងអំណរគុណចំពោះក្រុមហ៊ុន Golden Sun sky entertainment ដែលបានជួយឧបត្ថម្ភផ្តល់ទីតាំង កន្លែងស្នាក់នៅ និងជួយអាហារ២ពេល ដល់កងកម្លាំងប្រចាំការរៀងរាល់ថ្ងៃផងដែរ ។
សូមបញ្ជាក់ថា ទីតាំងបង្កើតស្នាក់ការសន្តិសុខនេះគឺស្ថិតនៅជាយក្រុងព្រះសីហនុដែលមានចំងាយប្រហែលជិត៨គីឡូម៉ែត្រឯណោះ ពីទីប្រជុំជន និងសាលាសង្កាត់ ក៏ដូចជាប៉ុស្តិ៍នគរបាលរដ្ឋបាលសង្កាត់លេខ៤ ហើយមានព្រំប្រទល់ជាប់នឹងឃុំបិតត្រាំង ក្នុងស្រុកព្រៃនប់ ដែលមានចំងាយឆ្ងាយពីទីប្រជុំជន ហើយទីតាំងនេះគឺជាកន្លែងដែលកំពុងអភិវឌ្ឍយ៉ាងខ្លាំងនូវសំណង់សណ្ឋាគារលំដាប់ផ្កាយក្រោមទុនជាច្រើនរយលានដុល្លាផងដែរ ៕