(ព្រះសីហនុ)៖ ជនទំនើង៣នាក់ ត្រូវនគរបាលខេត្តព្រះសីហនុ ស្រាវជ្រាវចាប់ខ្លួនបានជាបន្តបន្ទាប់ នៅយប់ថ្ងៃទី២៤ខែវិច្ឆិកា ឆ្នាំ២០១៨ បន្ទាប់ពីពួកគេបានធ្វើសកម្មភាពប៉ុនប៉ងធ្វើមនុស្សឃាតដោយចេតនាទៅលើជនជាតិចិន ចំនួន២លើក ពីរយប់ផ្ទួនៗ បណ្តាលឲ្យជនជាតិចិនចំនួន៣នាក់រងរបួសធ្ងន់ ។
បើតាមលោកឧត្តមសេនីយ៍ត្រី កុល ផាលី ស្នងការរង ទទួលផែនព្រហ្មទណ្ឌ នៅព្រឹកថ្ងៃទី២៦ ខែវិច្ឆិកា ឆ្នាំ២០១៨នេះបានថ្លែងបញ្ជាក់អោយដឹងថា ករណីទី១ នៅយប់ថ្ងៃទី២០ ខែវិច្ឆិកា ឆ្នាំ២០១៨ វេលាម៉ោង២និង០០នាទី នៅផ្លូវជិតព្រះរាជដំណាក់ ស្ថិតនៅភូមិ៣ សង្កាត់លេខ៣ មានជនសង្ស័យ៤នាក់ ជិះម៉ូតូ ២គ្រឿង បានធ្វើសកម្មភាពប្រើដាវកាប់ វាយ ទៅលើបុរសជនជាតិចិន១នាក់ ដែលកំពុងឈរបទជើងតូច ក្បែរចិញ្ចើមផ្លូវ បណ្តាលឲ្យរងរបួសជាទម្ងន់ ហើយជនល្មើសបានជិះម៉ូតូគេចខ្លួនបាត់អស់ទៅ ។
ករណីទី២ នៅយប់ថ្ងៃទី២១ ខែវិច្ឆិកា ឆ្នាំ២០១៨ វេលាម៉ោង ២៣:៣០នាទី នៅផ្លូវកាស៊ីណូឡាយអ៊ិនស៊ីធីចាស់ ស្ថិតនៅក្រុមទី១៤ ភូមិ៤ សង្កាត់លេខ៤ ក្រុងព្រះសីហនុ មានជនសង្ស័យចំនួន៤នាក់ ជិះម៉ូតូ២គ្រឿងដដែល បានធ្វើសកម្មភាព ប្រើដាវ កាប់និងវាយ ទៅលើបុរសជនជាតិចិន២នាក់ ដែលកំពុងដើរតាមផ្លូវ បណ្តាលឲ្យរងរបួសជាទម្ងន់ ហើយជនល្មើស បានជិះម៉ូតូគេចខ្លួនបាត់ទៅ។
លោកឧត្តមសេនីយ៍ត្រីកុល ផាលី បានឲ្យដឹងបន្ថែមថា ៖ ក្រោយពេលទទួលបានព័ត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានចាត់ឲ្យកម្លាំងជំនាញ គ្រប់ផ្នែកសហការគ្នា បើកការស៊ើបអង្កេតរុករកមុខសញ្ញា បង្កហេតុជាបន្ទាន់ រហូតដល់យប់ ថ្ងៃទី២៤ ខែវិច្ឆិកា ឆ្នាំ២០១៨ វេលាម៉ោង ២២:០០នាទី សមត្ថកិច្ចស្រាវជ្រាវស្វែងរក ចាប់ខ្លួនជនសង្ស័យបានចំនួន៣នាក់រួមមាន៖ ១-ឈ្មោះយ៉ា សុក្រី ហៅ កា ភេទប្រុស អាយុ ១៨ឆ្នាំ មុខរបរ កម្មករសំណង់ផ្នែកជាងភ្លើង មានទីលំនៅ ភូមិ៥ សង្កាត់លេខ៤ ក្រុងព្រះសីហនុ (ជនដៃដល់ អ្នកបើកម៉ូតូ ) ។ ២-ឈ្មោះហាស់ អាល់ហ្វារី ហៅ ឌួង ភេទប្រុស អាយុ ១៨ឆ្នាំ មុខរបរ កម្មករសំណង់ ផ្នែកជាងភ្លើង មានទីលំនៅ ភូមិ៥ សង្កាត់លេខ៤ ក្រុងព្រះសីហនុ (ជនដៃដល់ ជិះពីក្រោយកាន់ដាវកាប់) ។
៣-ឈ្មោះ ធឿន សាធិ ភេទប្រុស អាយុ ១៨ឆ្នាំ មុខរបរ មិនពិតប្រាកដ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ (ជនដៃដល់ ជិះពីក្រោយកាន់ដាវកាប់) ។
វត្ថុតាងចាប់យកបាន៖ -ដាវ ១ដើម (ឧបករណ៍ធ្វើសកម្មភាព) -ដំបងដែករលាស់១ដើម (ឧបករណ៍ធ្វើសកម្មភាព) -ម៉ូតូ១គ្រឿង ម៉ាកវេវពណ៌ខ្មៅ ស្លាកលេខៈ ភ្នំពេញ 1FP-8812 (មធ្យោបាយជិះធ្វើសកម្មភាព) ។
នៅចំពោះមុខសមត្ថកិច្ចជនសង្ស័យ បានសារភាពថាពួកគេបាន ប្រព្រឹត្តបទល្មើស ប៉ុនប៉ងមនុស្សឃាត ទៅលើជនជាតិចិន ទាំងពីរលើក ពិតប្រាកដមែន ដោយសារពួកគេខឹងជនជាតិចិន ដែលបានមកផឹកស៊ី នៅលើផែទូកទេសចរណ៍ ហើយរាំអោបមិត្តស្រីរបស់ពួកគេ ធ្វើអោយជនសង្ស័យខឹង បាននាំគ្នា៤នាក់ ជិះម៉ូតូ ២គ្រឿង តាមកាប់ជនរងគ្រោះតែម្តង។
ជនសង្ស័យបានសារភាពបន្ថែមថា៖ ពួកគេស្អប់ជនជាតិចិន ពី ព្រោះជនជាតិចិន មកដល់ប្រទេសកម្ពុជា ពេលផឹកស៊ី និងចេញពីធ្វើការ ដើររញ៉េរញ៉ៃពាសពេញផ្លូវ គ្មានសណ្តាប់ធ្នាប់ ពេលពួកគេស៊ីប្លេរ ម៉ូតូឲ្យជៀស បែរជាស្រែជេរពួកគេទៅវិញ ។
ជនរងគ្រោះក្នុងអំពើប៉ុនប៉ងមនុស្សឃាតនេះមាន៖ ១ រងគ្រោះ នៅថ្ងៃទី ២០ ខែវិច្ឆិកា ឆ្នាំ២០១៨ ឈ្មោះ LIANG GUIBIN ភេទប្រុស អាយុ ២៦ឆ្នាំ ជនជាតិចិន មុខរបរ បុគ្គលិកកាស៊ីណូ HUNG LEI លិខិតឆ្លងដែនលេខៈ EE៤៤១២៤០៨ ស្នាក់នៅក្រុម៣០ ភូមិ៣ សង្កាត់៣ ក្រុង-ខេត្តព្រះសីហនុ រងរបួសធ្ងន់ កំពុងសម្រាកព្យាបាលនៅមន្ទីពេទ្យបង្អែកខេត្តព្រះសីហនុ ។ រងគ្រោះនៅថ្ងៃទី២១ ខែវិច្ឆិកា ឆ្នាំ២០១៨ មានចំនួន ២នាក់៖
១-ឈ្មោះ ZHOU WENBING ភេទប្រុស អាយុ ២៧ឆ្នាំ ជនជាតិចិន មុខរបរ ទេសចរណ៍ ស្នាក់នៅកាស៊ីណូយ៉ាឌួលី ក្រុម១៥ ភូមិ៤ សង្កាត់៤ ក្រុង-ខេត្តព្រះសីហនុ រងរបួសធ្ងន់ កំពុងសម្រាកព្យាបាលនៅមន្ទីពេទ្យបង្អែកខេត្តព្រះសីហនុ ។២-ឈ្មោះ WANG SI REA ភេទប្រុស អាយុ ២៥ឆ្នាំ ជនជាតិចិន អ្នកទេសចរណ៍ ស្នាក់នៅ ភូមិ៤ សង្កាត់លេខ៤ ក្រុង-ខេត្តព្រះសីហនុ រងរបួសធ្ងន់ បញ្ជូនទៅសង្គ្រោះ នៅរាជធានីភ្នំពេញ ។
ករណីនេះ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ៕