ជនសង្ស័យ ជនជាតិចិន ៨ នាក់ត្រូវបានឃាត់ខ្លួន ពីបទបង្ខាំងមនុស្សជំរិតទារប្រាក់

4


ខេត្តព្រះសីហនុ៖ គិតមកដល់ ម៉ោង១ និង ៣០នាទី រសៀលថ្ងៃទី ២២ កក្កដា ឆ្នាំ ២០១៩ នេះ យោងតាមសមត្ថកិច្ចនគរបាលខេត្តព្រះសីហនុ បានឲ្យដឹងថា ជនសង្ស័យ ពីបទបង្ខាំងមនុស្ស ខុសច្បាប់ ដែលប្រព្រឹត្តទៅ នៅក្នុងសណ្ឋាគារនិងកាស៊ីណូឃ្វីនកូត្រូវបាន សមត្ថកិច្ច កំពុងសាកសួរកសាងសំណុំរឿងតាមនិតិវិធី។

ប៉ុន្តែចំពោះអត្តសញ្ញាណ ជនសង្ស័យទាំង ៨នាក់ និងជនរងគ្រោះពីរនាក់ សមត្ថកិច្ចពុំទាន់ដឹងនៅឡើយទេ រង់ចាំពេលវេលាសាកសួរ ឲ្យបានមាត់ជាប់ជាមុនសិន។ ប្រភពពីសមត្ថកិច្ចដដែលបានឲ្យដឹងថា ករណីនេះ បើយោងតាមការពិនិត្យជំហានដំបូង គឺជនសង្ស័យទាំង ៨ នាក់នេះ បានឃាត់ខ្លួន ជនរងគ្រោះចំនួន ២ នាក់ យកមកបង្ខាំងទុក នៅក្នុងកាស៊ីណូនិងសណ្ឋាគារខ្វីនកូ ដែលមានទីតាំងឋិតនៅ ភូមិ ៣ សង្កាត់លេខ ៣ ក្រុងនិងខេត្តព្រះសីហនុ ដោយតម្រូវឲ្យជនរងគ្រោះទាំងពីរ ប្រគល់ប្រាក់ ឲ្យពួកគេ ជាថ្នូរនឹងការដើរលេង ប៉ុន្តែគេនៅពុំទាន់ដឹង ថាទឹកប្រាក់ដែលជនសង្ស័យទាំង ៨ នាក់នោះ ទាមទារមានចំនួនប៉ុន្មាននោះទេ។

គួររំលឹកផងដែរថា កាលពីម៉ោង៨:៣០នាទី ថ្ងៃ២១ ខែកក្កដា ឆ្នាំ២០១៩ សមត្ថកិច្ចចម្រុះមាននគរបាលនិងកងរាជអាវុធហត្ថខេត្តបង្ក្រាបបានករណីជនជាតិចិនចាប់ជំរិត ជនជាតិចិនដូចគ្នា នៅសណ្ឋាគារនិងកាសុីណូ ឃ្វីនកូ បន្ទប់លេខ៦ ជាន់ទី៥ ក្នុងសង្កាត់លេខ៣ ក្រុងព្រះសីហនុ។

សមត្ថកិច្ចបញ្ជាក់ថា ជនរងគ្រោះមានគ្នា២នាក់ ចំណែកជនសង្ស័យមាន បក្ខពួកចំនួន៨នាក់
វត្ថុតាំង រួមមាន៖
ទី១- រថយន្តIexus570មួយគ្រឿង
ទី២-​ ទូរស័ព្ទ១០គ្រឿង
ទី៣-​ កាត ធនាគារ ១៣
ទី៤- លិខិត ឆ្លងដែន៣ក្បាល
ទី៥- អត្តសញ្ញណប័ណ្ណចិន៤ច្បាប់
ទី៦-​ កាបូបស្ពាយ១
ទី៧-​ ខ្សែរិត ១ដុំ។

បញ្ហា​ចាប់ជំរិត​ ចាប់​បង្ខាំង​មនុស្ស​ដោយ​ខុសច្បាប់​នេះ​កន្លងមក​ក៏មាន​ច្រើន​ករណី​ផងដែរ​សម្រាប់​ជនបរទេស​ ពិសេស​ជនជាតិ​ចិន​ដែល​មកធ្វើការ​នៅ​ព្រះរាជាណាចក្រ​កម្ពុជា​យើង​ ប៉ុន្តែ​ករណី​ទាំងនេះ​មិនអាច​រំលង​ពី​ដៃ​សមត្ថកិច្ច​និង​សំណាញ់​ច្បាប់​របស់កម្ពុជានោះឡើយ​៕

 

Comments

comments