អ្នកគ្រប់គ្រងទូកខាងផ្នែកផ្គត់ផ្គង់ម្ហូបអាហារជូនដល់កីឡាករ អុំទូក មកពីខេត្ដ កណ្ដាល បានអះអាងថា ក្នុងមួយថ្ងៃ កីឡាករ កីឡាការិនី ត្រូវការហូបចុក៣ពេល គឺពេលព្រឹក ពេលថ្ងៃ និង ពេលល្ងាចសម្រាប់ទូកមួយ ដែលសរុបលើការចំណាយចំពោះការហូបចុក និងការផ្គត់ផ្គង់ម្ហូប អាហារដល់កីឡាករនេះ អស់ថវិកាប្រមាណជាង១២.០០.០០០រៀល។
លោក ថាន គឹមសួរ ជាអ្នកធ្វើម្ហូប និងជាអ្នកគ្រប់គ្រងផ្នែកម្ហូបអាហារជូនដល់កីឡាករ ទូកឈ្មោះព្រែក ដំបងសែនជ័យសិរីពលះ ដែលស្ថិតនៅក្នុងវត្ដថ្មី ឃុំព្រែកដំបង ស្រុកមុខកំពូល ខេត្ដកណ្ដាល ដែលកំពុងធ្វើម្ហូបអាហារនៅកន្លែងស្នាក់នៅក្នុងតំបន់អភិវឌ្ឍន៍ជ្រោយចង្វារ ក្នុងរាជធានីភ្នំពេញ បានឱ្យដឹងនៅថ្ងៃទី០៣ ខែវិច្ឆិកា ឆ្នាំ២០១៧ នេះថា ការរៀបចំម្ហូបអាហារ និងបាយដល់កីឡាករអុំទូក គឺមានបីពេលក្នុងមួយថ្ងៃ ពេលព្រឹកត្រូវបបរចំនួនពីខ្ទះ ពេលថ្ងៃ ដាំបាយពីរខ្ទះ និងពេលល្ងាចបាយចំនួន ពីរខ្ទះទៀត ក្នុងនោះ ត្រូវការសាច់ប្រមាណជាង៧០ គីឡូក្រាម និងអង្ករ១បេកន្លះ ស្មើនឹង៧៥គីឡូក្រាម ហើយគិតជាទឹកប្រាក់ជាមធ្យមអស់ ប្រមាណ១២.០០.០០០រៀល។
លោកបានបន្ដថា ការចំណាយអស់ថវិកាក្នុងមួយថ្ងៃប្រមាណ ជាង១លានរៀលនេះ គិតតែម្ហូបអាហារ តែប៉ុណ្ណោះ មិនគិតបញ្ចូលទឹកសុទ្ធ ឬភេសជ្ជៈនោះទេ គឺត្រូវការចំណាយផ្សេងទៀតក្រៅពីម្ហូបអាហារ។
លោកបានលើកឡើងថា ការផ្គត់ផ្គង់ម្ហូបអាហារ និងការចំណាយសរុបក្នុងមួយថ្ងៃនេះ គឺរាប់បញ្ចូលទាំង កីឡាករអុំទូកក្នុងចំណុះទូកដែលមានចំនួន៦៣នាក់ បូករួមទាំងអ្នកគ្រប់ គ្រងទូក គណៈកម្មការទូក អ្នករៀបចំ និងអ្នកផ្គត់ផ្គង់ម្ហូបអាហារ និងចុងភៅដែលសរុប ទាំងអស់ចំនួនជាង១០០នាក់ ក្នុងមួយទូកនេះ។
លោកបានពន្យល់ថា ការដាំបាយ និងដាំស្ល ក្នុងមួយពេលត្រូវធ្វើចំនួនពីរមុខម្ហូប ដោយ ធ្វើការប្ដូរមុខម្ហូប ជារៀងរាល់ពេល ក្នុងមួយថ្ងៃ ដើម្បីឱ្យកីឡាករអុំទូក កាន់តែមានកម្លាំង ខ្លាំងក្លាក្នុងការអុំទូកដណ្ដើម យកជ័យជម្នះក្នុងការប្រកួត។ ក្នុងនោះកីឡាករចំណុះទូក មានចំនួន៤៤នាក់ បូករួមជាមួយអ្នកគ្រប់គ្រង និងគណៈកម្មការទូកសរុបទាំងអស់មានជាង ៦០នាក់។
