សម្ដេចក្រឡាហោម ស ខេង បានថ្លែងយ៉ាងដូច្នេះថា «កន្លងមករាជរដ្ឋាភិបាលបានផ្ដាច់នូវការ លើកលែងតម្លៃសេវាអត្តសញ្ញាណកម្មទាំងអស់ ដូច្នេះអគ្គនាយកដ្ឋានអត្តសញ្ញាណកម្ម រដ្ឋបាលថ្នាក់ក្រោមជាតិ ស្នងការដ្ឋានរាជធានី-ខេត្ត អធិការនគរបាលក្រុង ស្រុក ខណ្ឌ និងប៉ុស្ដិ៍នគរបាលរដ្ឋបាលឃុំ សង្កាត់ ត្រូវយកចិត្តទុកដាក់បន្ដអនុវត្តការងារនេះឲ្យបានខ្ជាប់ខ្ជួន នេះជាចំណុចសំខាន់ដែលត្រូវយកចិត្តទុកដាក់ ជួនអីរដ្ឋាភិបាលយើងលើកលែង ហើយមានមន្ដ្រីនៅតែបន្ដយកទៀត ដូច្នេះការលុបរបស់រាជរដ្ឋាភិបាលវាអត់ន័យ»។
សូមជម្រាបថា សេចក្តីប្រកាសចេញដោយក្រសួងមហាផ្ទៃ និងក្រសួងសេដ្ឋកិច្ច និងហរិញ្ញវត្ថុ ចុះថ្ងៃទី៣០ ខែធ្នូ ឆ្នាំ២០១៦ ហើយមានប្រសិទ្ធិភាពអនុវត្តន៍ចាប់ពីថ្ងៃទី០១ ខែមករា ឆ្នាំ២០១៧ បានសម្រេចលុបចោលថ្លៃសេវា សម្រាប់ការងាររដ្ឋបាលមួយចំនួនដូចជា៖
* ការធ្វើសំបុត្រអាពាហ៍ពិពាហ៍ របស់ជនបរទេស ជាមួយប្រជាពលរដ្ឋខ្មែរ
* ការផ្តល់សៀវភៅស្នាក់នៅ
* ទុតិយតា ឬតតិយតា សៀវភៅស្នាក់នៅ
* ការស្នើសុំបន្ថែម ឬបន្ថយសមាជិក ក្នុងសៀវភៅស្នាក់នៅ
* ការផ្តល់សៀវភៅគ្រួសារ
* ទុតិយតា និងតតិយតា សៀវភៅគ្រួសារ
* ការស្នើសុំបន្ថែម ឬបន្ថយសមាជិកគ្រួសារ ក្នុងសៀវភៅគ្រួសារ
* ការផ្តល់អត្តសញ្ញាណបណ្ណសញ្ជាតិខ្មែរ
* ទុតិយតា ឬតតិយតា អត្តសញ្ញាណបណ្ណសញ្ជាតិខ្មែរ៕
