(ព្រះសីហនុ)៖ រសៀលថ្ងៃទី១១ ខែកញ្ញា ឆ្នាំ២០១៨នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានអញ្ជើញអាជីវករ ម្ចាស់ក្លឹបកំសាន្ត ហាងម៉ាស្សា ខារ៉ាអូខេ សណ្ឋាគារ និង កាស៊ីណូ ចំនួន៨៤នាក់ មានខ្មែរ ៦៣នាក់ ជនជាតិចិន ២០នាក់ និងជនជាតិកូរ៉េ១នាក់ មកចូលរួមប្រជុំ ក្នុងគោលបំណង ពង្រឹងប្រសិទ្ធភាព នៃការអនុវត្តច្បាប់ ឲ្យម្ចាស់អាជីវកម្មទាំងអស់ ត្រូវគោរពតាមលក្ខខណ្ឌច្បាប់នៃប្រទេសកម្ពុជា មិនត្រូវយកទីតាំងរបស់ខ្លួនប្រព្រឹត្តបទល្មើសជាដាច់ខាត។
ក្នុងកិច្ចប្រជុំនេះលោកឧត្តមសេនីយ៍ស្នងការ បានមានប្រសាសន៍លើកឡើងនូវ ៤ចំណុចសំខាន់សំខាន់ៗរួមមាន៖ ១.ការឧទ្ទេសនាម ណែនាំឲ្យបានស្គាល់គ្នា កុំឱ្យមានការភាន់ច្រឡំ សមាសភាពថ្នាក់ដឹកនាំនៃគណៈស្នងការ ។ ២.សំណូមពរ ឲ្យអាជីវករទាំងអស់ ទាំងខ្មែរ និងបរទេស ត្រូវគោរពច្បាប់នៃព្រះរាជាណាចក្រកម្ពុជា ចំពោះអ្នកប្រើប្រាស់យានយន្ត ត្រូវគោរពផ្លាកសញ្ញា ច្បាប់ចរាចរណ៍ផ្លូវគោក ។ លោកស្នងការបានបញ្ជាក់ថា ជនបរទេសដែលប្រើប្រាស់ប័ណ្ណបើកបរក្លែងក្លាយ និងជនខិលខូចផ្តល់ឯកសារក្លែងក្លាយឲ្យ អ្នកទាំងនោះត្រូវមានទោសពីបទក្លែងឯកសារសាធារណៈ និងប្រើប្រាស់ឯកសារខុសច្បាប់ ត្រូវមានទោសមិនអាចលើកលែងបានឡើយ ។ ៣.ក្លឹបឌីស្កូ ខារ៉ាអូខេ ត្រូវគោរពច្បាប់ទីតាំងត្រូវមានប្រព័ន្ធគ្រប់គ្រងសន្តិសុខ សុវត្ថិភាព កម្លាំងសន្តិសុខឯកជនត្រូវមានឯកសារអត្តសញ្ញាណប័ណ្ណត្រឹមត្រូវ ។ ម្ចាស់អាជីវកម្ម មិនត្រូវចែកចាយ ប័ណ្ណរូបភាពអាសអាភាស មិនត្រូវឆ្លៀតឱកាស យកទីតាំងទៅរកស៊ីប្រព្រឹត្តបទល្មើសខុសច្បាប់ ជួញដូរមនុស្ស និងជួញដូរប្រើប្រាស់គ្រឿងញៀន បើកបនពេស្យាចារជាដាច់ខាត ។
៤.ត្រូវមានការយោគយល់ គោរពច្បាប់ទាំងអស់គ្នា រួមគ្នាការពារសុវត្ថិភាព សន្តិសុខ ដើម្បីការពារអភិវឌ្ឍន៍ខេត្តព្រះសីហនុរបស់យើងឲ្យមានការរីកចម្រើន មានសន្តិសុខសណ្តាប់សុវត្ថិភាពល្អ ៕