(ព្រះសីហនុ)៖ កម្លាំងនគរបាលខេត្តព្រះសីហនុ ក្រោមការបញ្ជាផ្ទាល់ពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបើកប្រតិបត្តិការបង្រ្កាបគ្រឿងញៀនទ្រង់ទ្រាយធំនៅក្លឹបកំសាន្ត ស្កាយឡាញ “Sky Line club” ដោយឃាត់ខ្លួនជនសង្ស័យបានចំនួន ៥៣នាក់ ក្នុងនោះខ្មែរ ២៤នាក់ ជនជាតិចិន ១០នាក់ ឥណ្ឌូណេស៊ី ១៧នាក់ និងកូរ៉េ ២នាក់ ។
លោកឧត្តមសេនីយ៍ទោ ជួន ណារិន្ទ បានថ្លែងអោយដឹងថា ប្រតិបត្តិការបង្រ្កាបនេះបានចាប់ផ្តើមធ្វើឡើងកាលពីរំលងអធ្រាត្រថ្ងៃទី១៦ ខែសីហា ឆ្នាំ២០១៨ រហូតដល់ម៉ោង៥ភ្លឺ ថ្ងៃទី១៦ ខែសីហាឆ្នាំ២០១៨ ទើបបានបញ្ចប់ ដោយមានការសម្របសម្រួលពីអយ្យការអមសាលាដំបូងខេត្តព្រះសីហនុផងដែរ ។
លោកឧត្តមសេនីយ៍ត្រី ស៊ុន សុផាត ស្នងការរងទទួល ផែនប្រឆាំងបទល្មើស និងលោកវរសេនីយ៍ទោ សួស សីលា នាយការិយាល័យប្រឆាំងគ្រឿងញៀន ដែលបានដឹកនាំកំលាំងចុះប្រតិបត្តិការផ្ទាល់ បានឲ្យដឹងថា ៖ ពេលឆ្មក់ចូលឆែកឆេរ អ្នកទាំងនោះកំពុងប្រើប្រាស់ជាក់ស្តែងតែម្តង ថ្នាំញៀនទាំងនោះ រកឃើញនៅលើតុ គៀនៗសាឡុងអង្គុយ ក្នុងបន្ទប់ទឹក និងទីកន្លែងផ្សេងគ្នា ក្នុងរង្គសាល ។ ឃាត់ខ្លូនម្ចាស់ទីតាំងឈ្មោះគ្រុយ ផាន់ណា ហៅអាភឿកអាយុ៣៨ឆ្នាំ មានទីលំនៅ ភូមិ៤សង្កាត់លេខ៤ ក្រុងព្រះសីហនុ និង មនុស្សចំនួន៥២ នាក់ ស្រី៧នាក់ ជនជាតិចិន១០នាក់ ឥណ្ឌូនេស៊ី១៧នាក់ កូរ៉េ២នាក់ ភាគច្រើនជាបុគ្គលិកបំរើការងារក្នុងកាស៊ីណូ ហ្គោលឌិនស៊ី និង តុងហ្វាងមិនជូ និងប្រជាពលរដ្ឋខ្មែរ ចំនួន២៤នាក់។ វត្ថុតាងចាប់យកបានថ្នាំញៀន ខេតាមីន និង អិចស្តាស៊ី ចំនួន២៩កញ្ចប់ ថ្នាំញៀនអ៉ិចស្តាស៊ីទឹក ៤ដប និង អ៉ិចស្តាស៊ីគ្រាប់ ៣គ្រាប់ ។
បុរសម្នាក់ក្នុងចំណោម មនុស្ស៥៣នាក់ បានសារភាពប្រាប់សមត្ថកិច្ចថា៖ ថ្នាំញៀនទាំងនោះ បានទិញក្នុងរង្គសាលនោះតែម្តង ។ ក្រោយពេលធ្វើតេស្ដ អ្នកទាំងអស់ មានផ្ទុកសារធាតុថ្នាំញៀន។ បច្ចុប្បន្នជនសង្ស័យទាំងអស់កំពុងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់៕
