(ព្រះសីហនុ)៖ ដើម្បីបង្ការនិងកាត់បន្ថយគ្រោះថ្នាក់ចរាចរណ៍តាមផ្លូវជាតិលេខ៤ នៅរសៀលថ្ងៃទី២៧ ខែកញ្ញា ឆ្នាំ២០១៨ កម្លាំងការិយាល័យនគរបាលចរាចរណ៍ផ្លូវគោក ចំនួន ១២នាក់ រថយន្តស៊ីរ៉ែនចំនួន ០១គ្រឿង និង រថយន្តល្បាត ចំនួន ០១គ្រឿង ដឹកនាំដោយលោកវរសេនីយ៍ទោ សំរិទ្ធ លន់ នាយរងការិយាល័យនគរបាលចរាចរណ៍ផ្លូវគោក ក្រោមការចង្អុលបង្ហាញពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចុះល្បាត ចល័ត លើភូមិសាស្ត្រ ផ្លូវជាតិលេខ៤ ចាប់ពីក្រុងព្រះសីហនុ រហូតដល់ ចន្លោះគីឡូម៉ែត្រ ២០៦-២០៧ ស្ថិតនៅក្នុងភូមិស្មាច់ដែង ឃុំរាម ស្រុកព្រៃនប់ ដើម្បី រឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក អប់រំ ណែនាំ ត្រួតពិនិត្យជាតិស្រវឹងលើអ្នកបើកបរ និងត្រួតពិនិត្យល្បឿនផងដែរ ។
ជាលទ្ធផលនគរបាលបានអប់រំណែនាំ ដល់អ្នកបើកបររថយន្តចំនួន ៤០នាក់ អ្នកបើកបររថយន្តធុនធំចំនួន ១៥នាក់ កុំឲ្យបើកបរមានល្បឿនលឿន វ៉ាជែងក្នុងស្ថានភាពគ្រោះថ្នាក់ ពេលបើកបរកុំពិសារគ្រឿងស្រវឹង មិនអោយប្រើប្រាស់គ្រឿងញៀន និងបើកបរចេះអធ្យាស្រ័យគ្នាទៅវិញទៅមក ។
ចំពោះការត្រួតពិនិត្យរកជាតិស្រវឹងទៅលើអ្នកបើកបររថយន្តមួយចំនួននៅពេលនេះនគរបាលបញ្ជាក់ថា ល្អដោយសារពុំបានរកឃើញអ្នកបើកបររូបណា មានហូបគ្រឿងស្រវឹងពេលបើកបរឡើយ ៕
