កាលពីថ្ងៃទី០៣ ខែកក្កដា ឆ្នាំ២០១៧នេះ សមត្ថកិច្ចអាវុធហត្ថរាជធានីភ្នំពេញ បានបញ្ជូនស្ត្រីម្នាក់ ឈ្មោះ ភួង ចន្នី អាយុ៥០ឆ្នាំទៅតុលាការ ក្រោមការចោទប្រកាន់ពីបទកេងប្រវ័ញ្ចពលកម្មលើកុមារ និងរក្សាទុកកុមារដោយខុសច្បាប់។ស្ត្រីខាងលើ រួមជាមួយស្ត្រីវ័យចំណាស់ម្នាក់ទៀត ត្រូវបានមន្ត្រីជំនាញនៃការិយាល័យបង្ក្រាបបទល្មើស ជួញដូរមនុស្សកងរាជអាវុធហត្ថរាធានីភ្នំពេញ សហការណ៍ជាមួយ មូលដ្ឋានអាវុធហត្ថខណ្ឌដូនពេញ, មន្ទីសង្គមកិច្ចរាជធានីភ្នំពេញ, អង្គការពន្លកថ្មី និងអង្គការ IJM ធ្វើការបង្ក្រាបជាក់ស្តែងកាលពីយប់ថ្ងៃទី៣០ ខែមិថុនា ឆ្នាំ២០១៧ វេលាម៉ោង២១ និង៣០នាទី នៅចំណុចមុខសណ្ឋាគារកាហ្សា ផ្លូវ៤៧ សង្កាត់វត្តភ្នំ ខណ្ឌដូនពេញ រាជធានីភ្នំពេញ ខណៈដែលពួកគេបានបង្ខំឲ្យក្មេងៗដើរសុំទាន ហើយគេនៅមួយកន្លែងចាំយកលុយពីក្មេងៗ ព្រមគ្នានោះសមត្ថកិច្ចអាវុធហត្ថរាជធានីភ្នំពេញ រំដោះបានកុមាររងគ្រោះ០៧នាក់(ក្នុងនោះមានទារក០២នាក់)។ ក្រោយពេលឃាត់ខ្លួន ស្ត្រីជាមេក្លោងខាងលើ បានសារភាពថា រូបគេពិតជាបានប្រមូលក្មេងៗ ពីឳពុកម្តាយក្រីក្រនិងអ្នកសុំទានផ្សេងទៀត ឲ្យមកនៅជាមួយក្នុងនាមជាកូនចៅឬក្មួយ ដើម្បីឲ្យដើរសុំទាន ពិតប្រាកដមែន ហើយរូបគេធ្វើបែបនេះ ប្រហែល៧ទៅ៨ឆ្នាំមកហើយ។ តាមការរៀបរាប់របស់ក្មេងៗ ដែលអាវុធហត្ថរាជធានីភ្នំពេញរំដោះបាន បានរៀបរាប់ថា ពួកគេមិនបានរៀនសូត្រទេ ហើយទទួលទានអាហារក៏មិនគ្រប់គ្រាន់ដែរ និងត្រូវបានស្ត្រីដែលឲ្យពួកគេហៅថាម៉ែគម្រាម ឲ្យដើរសុំទានគ្រប់ពេលវេលា ដោយមានបីកូនង៉ាតូចៗ ដែលមិនមែនជាប្អូនរបស់ខ្លួនជាប់ជាមួយផង ហើយ ពួកគេត្រូវដើរសុំទានទាំងយប់ទាំងថ្ងៃពិសេសកណ្តាលភ្លៀងធ្លាក់ផងដែរដើម្បីទាញក្តីអាណិតអាសូរ ពីអ្នកឲ្យទាន នៅតាមមាត់ទន្លេ រមណីយដ្ឋានវត្តភ្នំ មុខសណ្ឋាគារកាហ្សា មុខវត្ត មុខវាំង និងតាមស្តុបកែងផ្លូវផ្សេងៗក្នុងមួយថ្ងៃពួកគេត្រូវស្ត្រីខាងលើដេញឲ្យទៅដើរសុំទានឲ្យបានចន្លោះពី១ម៉ឺនទៅ៣ម៉ឺនរៀលបើសុំមិនបានឬបានតិចជាងចំនួនកំណត់ ពួកគេនឹងត្រូវទទួលពិន័យ ២០រំពាត់ឬខ្សែភ្លើងទូរស័ព្ទ រហូតមានស្នាមរបួសតាមខ្លួន ក្បាល និងមុខ។ សូមបញ្ជាក់ដែរថា បច្ចុប្បន្ន ក្មេងៗទាំង៧នាក់នោះ នៅមិនទាន់អាចរកឪពុកម្តាយពិតប្រាកដពួកគេឃើញនៅឡើយទេ ហើយមន្ត្រីកងរាជ អាវុធហត្ថរាជធានីភ្នំពេញ រួមជាមួយមន្ទីរសង្គមកិច្ចបានយកពួកគេប្រគល់ឲ្យអង្គការពន្លកថ្មីដើម្បីចឹញ្ចឹមបីបាច់មើលថែរក្សានិងចូលសាលារៀនសូត្រ។ ចំណែកស្ត្រីម្នាក់ទៀតដែលអាវុធហត្ថឃាត់មកជាមួយគ្នា គ្រាន់តែជួយពរកូនង៉ារឲ្យគេ និងមានសុខភាពទន់ខ្សោយព្រោះកើតជម្ងឺអេដស៍ធ្ងន់ធ្ងរផងនោះត្រូវបានអនុញ្ញាតឲ្យត្រឡប់ទៅវិញ។មានចម្ងល់ជាច្រើនបានលើកឡើងថាចំពោះករណីខាងលើតើអ្នកដាក់ទានទាំងនោះកំពុងធ្វើបុណ្យឬកំពុងជម្រុញលើកទឹកចិត្តអ្នកសុំទានឲ្យកាន់តែមានច្រើនក្នុងប្រទេសបាត់សេចក្តីថ្លៃថ្នូរជាតិបាត់សណ្តាប់ធ្នាប់សង្គមធ្វើឲ្យក្មេងទទួលទារុណកម្មមិនបានចូលរៀនខូចអនាគត ព្រមទាំងអាចធ្លាក់ចូលទៅក្នុងអំពើឧបាយមុខផ្សេងៗ? ប្រាកដណាស់ ប្រាក់ដែលពួកគេដាក់ទានទាំងនោះ មិនបានជាប្រយោជន៍ដល់កុមារតូចៗឡើយ គឺបានតែទៅលើដៃអ្នកនៅពីក្រោយតែប៉ុណ្ណោះ៕
