កំពង់ធំ: ដើម្បីអបអរសាទរ បុណ្យរុក្ខទិវា៩កក្តដា នៅថ្ងៃទី១៧ ខែកក្កដា ឆ្នាំ២០១៧ ក្រោមអធិបតីភាពលោក ងួន សុជាតិ អភិបាលរងខេត្តកំពង់ធំ និងដោយមានការអញ្ជើញចូលរួមពីប្រធាន អនុប្រធានមន្ទីរនានាជុំវិញខេត្ត កងកម្លាំងទាំង៣ប្រភេទ លោកគ្រូ អ្នកគ្រូ សិស្សានុស្សិស្ស និងប្រជាពលរដ្ឋចូលរួមយ៉ាងច្រើនកុះករ នៅសួនបណ្តុះកូនឈើសម្តេច ហ៊ុន សែន ទួលដំណាក់ស្ថិតក្នុងឃុំចុងដូង ស្រុកបារាយណ៍ ខេត្តកំពង់ធំ បានរៀបចំប្រារព្ធពិធីផ្តល់កូនឈើប្រណិត១៧,៦៩០ដើម។ លោក ម៉ក យុន្ធនា អនុប្រធានមន្ទីរកសិកម្មខេត្តកំពង់ធំ បានឲ្យដឹងថា នៅក្នុងឆ្នាំ២០១៧នេះ រដ្ឋបាលព្រៃឈើបានបណ្តុះកូនឈើទុកផ្តល់ និងចែកជូនប្រជាពលរដ្ឋ ក្នុងនោះមានកូនដើមឈើ ដែលមានរយៈពេលវែងដូចជា ក្រញូង បេង ធ្នង់ គគីរ ច្រេះ ឈើទាល ត្រសេក មានចំនួន៧,៨៥០ដើម និងកូនឈើហូបផ្លៃមានដូចជា ខ្នុរ ស្វាយ ទៀប ស្លា ស្តៅ ម្រុំ ដែលមានចំនួន ៩,៨៤០ដើម។លោក ងួន សុជាតិ បានសំដែងការកោតសរសើរចំពោះមន្ទីរកសិកម្ម រុក្ខាប្រមាញ់ និងនេសាទ ដែលបានរៀបចំប្រារព្ធពិធីផ្តល់កូនឈើអបអរសាទរ បុណ្យរុក្ខទិវា៩កក្តដា នៅសួនបណ្តុះកូនឈើសម្តេច ហ៊ុន សែន ទួលដំណាក់ ដើម្បីជួយបង្កើនគម្របព្រៃឈើ និងស្តារព្រៃឈើ ឡើងវិញនៅក្នុងខេត្តឲ្យកាន់តែប្រសើរ។លោកអភិបាលរងខេត្តបានបន្តថា ការប្រារព្ធពិធីរុក្ខទិវា៩កក្តដានេះ គឺជាការឆ្លុះបញ្ចាំងឲ្យឃើញ នូវការខិតខំប្រឹងប្រែងយ៉ាងសកម្ម របស់រាជរដ្ឋាភិបាល ក្នុងការចាត់វិធានការយ៉ាងម៉ឹងម៉ាត់ ដើម្បីគ្រប់គ្រង អភិរក្សធនធានព្រៃឈើ ធនធានធម្មជាតិជីវចម្រុះ ដើម្បីជួយថែរក្សាដំណើរការប្រព័ន្ធអេកូឡូស៊ី កាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ កាត់បន្ថយគ្រោះធម្មជាតិនានា និងការស្រូបយកឧស្ម័នកាបូនិច ពីបរិយាកាសផងដែរ។អភិបាលរងខេត្តកំពង់ធំ បានបន្ថែមថា ប្រជាពលរដ្ឋទាំងអស់ ត្រូវចាប់ផ្ដើមដោយមិនបង្អែរបង្អង់នូវផែនការសា្ដរព្រៃឈើ និងដាំឈើឡើងវិញ ដើម្បីរក្សាបាននូវលំនឹងបរិស្ថាន ធម្មជាតិ និងភោគសម្បត្ដិឲ្យកាន់តែមានភាពស្រស់បំព្រង សម្រាប់សង្គមជាតិទាំងមូល និងបានសំណូមពរដល់មន្ទីរអង្គភាពទាំងអស់ ចូលរួមដាំដើមឈើតាមអង្គភាព ទីសាធារណៈ តាមដងផ្លូវ ដើម្បីធ្វើជាគំរូដល់ប្រជាពលរដ្ឋ៕
