(ភ្នំពេញ) ៖ រដ្ឋមន្ត្រីក្រសួងការងារ និងរដ្ឋមន្ត្រីក្រសួងសុខាភិបាល បានប្រកាសរួមគ្នានៅថ្ងៃនេះថា នៅដើមឆ្នាំ២០១៨ រដ្ឋាភិបាលនឹងផ្តល់សេវាថែទាំសុខភាពដោយឥតគិតថ្លៃ ជូនដល់កម្មករសំណង់នៅទូទាំងប្រទេស ដើម្បីឱ្យដូចកម្មករនិយោជិតរោងចក្រកាត់ដេរដែរ។ នៅពេលនេះ ក្រសួងការងារកំពុងចុះស្រង់ស្ថិតិកម្មករ និងការដ្ឋានសំណង់ ដើម្បីរៀបចំការផ្តល់សេវាថែទាំសុខភាពដោយឥតគិតថ្លៃជូនពួកគាត់។ ឯកឧត្ដម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ បានលើកឡើងថា យន្តការនេះ គឺជាការឆ្លើយតបទៅនឹងអនុសាសន៍ ក៏ដូចជាគោលនយោបាយរបស់រដ្ឋាភិបាល តាមលក្ខខណ្ឌការងារ ប្រាក់ចំណូលសមរម្យ សុវត្ថិភាពការងារ និងការអភិវឌ្ឍសេដ្ឋកិច្ចប្រទេស។ ករណីប្រសិនបើកម្មករសំណង់គ្មាននិយោជកផ្តល់វិភាគទានថែទាំសុខភាពជូនទេនោះ គឺពួកគេនឹងទទួលព្យាបាលតាមបែបមូលនិធិសមធម៌ ដែលក្រសួងសុខាភិបាល ផ្តល់ជូនតាមមន្ទីរពេទ្យរដ្ឋនានា។ ចំណែករដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានគាំទ្រនូវការលើកឡើងរបស់រដ្ឋមន្ត្រីក្រសួងការងារ ហើយថា រាល់ការថែទាំ និងព្យាបាលសុខភាពដល់កម្មករនិយោជិតដោយឥតគិតថ្លៃនេះ គឺពឹងផ្អែកលើការទម្លាក់ថវិកាពីក្រសួងសេដ្ឋកិច្ច និងហិរញ្ញវត្ថុ។ ក្រសួងការងារ និងបណ្ដុះបណ្តាលវិជ្ជាជីវៈ ក៏បានប្រកាសដែរថា ក្នុងឆមាសទី១ ឆ្នាំ២០១៧នេះ បេឡាជាតិរបបសន្តិសុខសង្គម បានពង្រីកវិសាលភាពផ្នែកហានិភ័យការងារ នៅទូទាំងប្រទេស និងបានចុះបញ្ជីការសហគ្រាស គ្រឹះស្ថាន សរុបចំនួន ៩ ១៦៥ សហគ្រាស ដោយមានកម្មករនិយោជិត ជាសមាជិកជាង ១លាន២សែននាក់។ ទន្ទឹមនឹងនោះដែរ បេឡាជាតិរបបសន្តិសុខសង្គម (ប.ស.ស.) បានផ្តល់ការព្យាបាលថែទាំសុខភាពជូនកម្មករ និយោជិត ដែលរងគ្រោះថ្នាក់ការងារ នៅតាមមន្ទីរពេទ្យប្រតិបត្តិនានាទូទាំងប្រទេស បានចំនួន ១ម៉ឺន ១ពាន់នាក់៕
