ភ្នំពេញ ៖ រថយន្តកាមរីបាឡែន១គ្រឿងដឹកឈើប្រណិតប្រភេទធ្នង់បើកក្នុងល្បឿនលឿនទៅបុកនិងរថយន្តឡិចស៊ីស LX470 ពេញទំហឹង បណ្ដាលឲ្យរថយន្តខូចខាតទាំងសងខាង ហើយអ្នកបើកបររត់គេចខ្លួនបាត់។ ហេតុការនេះបានបង្កឲ្យមានការភ្ញាក់ផ្អើលកាលពីវេលាម៉ោង១០និង៥០នាទីយប់ ថ្ងៃទី១០ ខែតុលា ឆ្នាំ២០១៧ ត្រង់ចំណុចផ្លូវភ្នំពេញហាណូយ កែងនិងផ្លូវសម្តេច ជា ស៊ីម ស្ថិតក្នុងសង្កាត់គោកឃ្លាង ខណ្ឌសែនសុខ ។តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ បន្ទាយមានជ័យ ២A-២៥១៧ ជារថយន្តច្នៃដោះកៅអីខាងក្រោយចេញដឹកឈើប្រណិតប្រភេទធ្នង់ពេញរថយន្ត ហើយបិទកញ្ចក់ពណ៌ខ្មៅ ធ្វើដំណើរតាមបណ្ដោយផ្លូវភ្នំពេញហាណូយ ក្នុងទិសដៅពីជើងទៅត្បូង និងក្នុងល្បឿនយ៉ាងលឿន ។ លុះមកដល់ចំណុចកើតហេតុ ក៏បានបត់ស្តាំទៅផ្លូវសម្តេច ជា ស៊ីម ស្រាប់តែមានរថយន្តមួយគ្រឿងទៀតម៉ាកឡិចស៊ីស LX470 ពណ៌ស អត់ចាំស្លាកលេខធ្វើដំណើរតាមបណ្តោយផ្លូវភ្នំពេញហាណូយ ក្នុងទិសដៅបញ្ច្រាសទិសគ្នា និងក្នុងល្បឿនលឿន រួចក៏បានបត់ឆ្វេតទៅផ្លូវ សម្តេច ជា ស៊ីម ទៅបុករថយន្តខាងលើចំពីមុខពេញទំហឹង បណ្ដាលឲ្យរថយន្តឡិចស៊ីសរងការខូចខាតយ៉ាងដំណំ ហើយព្យាយាមបើករត់គេចខ្លួនបាត់ស្រមោល។ ចំណែកឯរថយន្តកាមរីបាឡែនវិញក៏ រងការខូចខាតផ្នែកខាងមុខយ៉ាងដំណំដែល ភ្លាមៗនោះអ្នកបើកបរបានបើកទ្វារថយន្តចុះរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើហេតុ។ពាក់ព័ន្ធករណីខាងលើនេះ លោក ហឿន វឿន អធិការរងទទួលបន្ទុកផ្នែកសណ្តាប់និងចរាចរខណ្ឌសែនសុខបានប្រាប់តាមទូរស័ព្ទថា៖ លោកមិនទាន់បានទទួលព័ត៌មាននេះទេព្រោះគាត់កំពង់ជាប់រវល់ការពារក្បួនថ្នាក់ដឹកនាំ។ ដោយឡែកលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខវិញបានមានប្រសាសន៍ថា៖ រថយន្តកាមរីបាឡែន ដែលបង្ករគ្រោះថ្នាក់ចរាចរហើយមានដឹកឈើប្រណិតប្រភេទធ្នង់នោះគឺលោកបានអោយជំនាញផ្នែកចរាចរណ៍ខណ្ឌសែនសុខ ធ្វើការស្ទូចយកទៅរក្សាទុកបណ្តោះអាសន្នសិនដើម្បី ទុកប្រគល់ឲ្យរដ្ឋបាលព្រៃឈើយកទៅរក្សាទុក ៕
