ថ្ងៃនេះគេហទំព័រ កំណត់ត្រា សូមលើកយកជីវប្រវត្តិខ្លះៗ របស់តារាកំប្លែងដែលមានកេរ្តិ៍ឈ្មោះល្បីមួយរូបតាំងពីទសវត្សរ៍ ៩០ ។ តារាកំម្លែងរូបនេះមានឈ្មោះពិតគឺ អ្នកនាង លីវ លក្ខិណា ហៅ ប៉ុមពុយ ។
កាលពីឆ្នាំ ១៩៩០ អ្នកនាង ប៉ុមពុយ គឺអ្នកចម្រៀងផងនិងជាអ្នករបាំផង ប្រចាំសាលារៀន បន្ទាប់មកនៅឆ្នាំ ១៩៩២ អ្នកនាងធ្លាប់ថតចម្រៀងបានចំនួន ១២បទ នឹងធ្លាប់ថតរឿង (ម្លប់ពោធិ៍ដងស្ទឹងសង្កែ) អោយផលិតកម្ម ឆ្លងដែន ។ នៅក្នុងឆ្នាំ ១៩៩៥ អ្នកនាង ប៉ុមពុយ ធ្លាប់បានប្រឡងចម្រៀងប្រចាំប៉ុស្តិ៍ចំការចេក គឺបទ (វាសនាចំការសំរ៉ោង) ដោយពេលនោះអ្នកនាង ប៉ុមពុយ បានទទួលចំណាត់ថ្នាក់ជ័យលាភីលេខ ១ ។
អ្នកនាង ប៉ុមពុយ ចាប់ផ្ដើមក្លាយជាតារាកំប្លែងនៅក្នុងឆ្នាំ ២០០០ តាមរយៈអធិរាជស្តេចកំប្លែងគឺលោក អ៊ូ ប៊ុណ្ណារ៉ាត់ ហៅនាយ ក្រឹម ពេលនោះអ្នកនាងគឺជាតារាចម្រៀងផងនិងជាតារាកំប្លែងផង កាលពីទសវត្សរ៍ ២០០០ អ្នកនាង ប៉ុមពុយ គឺជាអ្នកចម្រៀងច្រៀងប្រចាំអោយ ភោជនីយដ្ឋាន ភ្នំមាស និងលេងកំប្លែងជាប្រចាំអោយ ភោជនីយដ្ឋាន រ៉េនបូ ។
គួរបញ្ជាក់ផងដែរថា សព្វថ្ងៃនេះអ្នកនាង ប៉ុមពុយ នៅតែបន្តអាជីពជាតារាកំប្លែង ប៉ុន្តែហាក់ដូចជាមិនត្រូវបានសារពត៌មានណាលើកយកមកនិយាយ ដោយសព្វថ្ងៃនេះ អ្នកនាងលេងកំប្លែងជាប្រចាំអោយក្រុមរបស់ នាយ ខ្ជឹប ប្រចាំនៅទូរទស្សន៍ ទទក៕
