(ព្រះសីហនុ)៖ នៅរសៀល ថ្ងៃទី៣០ ខែសីហា ឆ្នាំ២០១៨នេះ នៅស្នងការដ្ឋាននគរបាលខេត្តព្រះសីហនុ បានបើកកិច្ចប្រជុំបូកសរុបការងារ ការធ្វើសវនកម្មផ្ទៃក្នុងសម្រាប់ការិយបរិច្ឆេទ ២០១៧ ដែលបានធ្វើសវនកម្ម រយៈពេលជាងមួយសប្តាហ៍កន្លងមក ។
កិច្ចប្រជុំនេះដឹកនាំដោយលោកឧត្តមសេនីយ៍ទោ សៀន សុវណ្ណា អគ្គនាយករងនៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដោយមានការចូលរួមពីអស់លោក,លោកស្រី ស្នងការរង នាយ នាយរងការិយាល័យជំនាញ អធិការនគរបាលក្រុង ស្រុក នាយនគរបាលប៉ុស្តិ៍រដ្ឋបាលនានា ចំនួន២៩ប៉ុស្តិ៍ និងអស់លោកជាសមាជិកក្រុមការងារចុះធ្វើសវនកម្មមកពីក្រសួងមហាផ្ទៃ ។
បន្ទាប់ពីបានស្តាប់របាយការណ៍បូកសរុបលទ្ធផល នៃការធ្វើសវនកម្មរួចមកលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងអំណរគុណចំពោះប្រតិភូ ក្រុមការងារសវនកម្មផ្ទៃក្នុង ក្រសួងមហាផ្ទៃ ដែលចុះមកធ្វើសវនកម្មរយៈពេល១០ថ្ងៃកន្លងមកនេះ ប្រៀបដូចជាការ ចុះមកបង្ហាត់បង្រៀន ដល់មេផ្ទះឲ្យចេះគ្រប់គ្រង ចេះបែងចែក ចាយវាយថវិកា ឲ្យបានត្រឹមត្រូវ មានបញ្ជីស្នាមច្បាស់លាស់ ដូច្នេះដែរ។
លោកឧត្តមសេនីយ៍ទោ សៀនសុវណ្ណា បានបញ្ជាក់ថា ស្ថាប័នរដ្ឋនៅតាមអង្គភាពនីមួយៗ មានមនុស្ស ថវិកា ទ្រព្យសម្បត្តិ ជាអចលនទ្រព្យ និងចលនទ្រព្យ ។ ក្រុមការងារសវនកម្មផ្ទៃក្នុង ចុះមកធ្វើសវនកម្ម ដើម្បីជួយពិនិត្យមើលឯកសារ បញ្ជីគណនេយ្យ ចំណូល ចំណាយថវិកាជាតិ ការគ្រប់គ្រង និង ការបែងចែក សម្ភារៈប្រើប្រាស់ផ្សេងៗ ឲ្យបានត្រឹមត្រូវ ជួយកែតម្រូវ កែលម្អ ប្រកបដោយតម្លាភាព ចៀសវាងហានិភ័យកើតឡើង ក្នុងគោលបំណង ដើម្បីពង្រឹងប្រសិទ្ធភាពការងារ នៃការគ្រប់គ្រងធនធានមនុស្ស ការគ្រប់គ្រង ហិរញ្ញវត្ថុសាធារណៈ និងការគ្រប់គ្រង ទ្រព្យសម្បត្ដិរដ្ឋ ប្រកបដោយ គុណភាព និង មានប្រសិទ្ធភាព ៕
