(ប៉ៃលិន)៖ កម្មករសំណង់៤នាក់ស្លាប់ និងរបួស១នាក់ ខណៈពេលដែលដាច់ខ្សែរ៉ត ០១កើតឡើង នៅអាគារកំពុងសាងសង់ ពីជាន់ទី០៦ នៅខេត្តប៉ៃលិន ។
សមត្ថកិច្ចមូលដ្ឋានបានអោយដឹងថា កាលពីវេលាម៉ោង ០៧ :១៥ នាទីព្រឹក ថ្ងៃអង្គារ ទី០៤ ខែកញ្ញា ឆ្នាំ២០១៨ មានករណីដាច់ខ្សែរ៉ត ០១កើតឡើង នៅអាគារកំពុងសាងសង់ ពីជាន់ទី០៦ ដែលមានកំពស់សរុប១២ជាន់ ទល់មុខសណ្ឋាគារ ម្កុដពេជ្រ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន បណ្ដាលអោយមនុស្សស្លាប់ចំនួន ០៤នាក់ និងរបួស ០១ នាក់។
សមត្ថកិច្ចមូលដ្ឋាន បានឲ្យដឹងថា ជនរងគ្រោះទី១៖ឈ្មោះ លីម វែង អាយុ១៨ឆ្នាំ រស់នៅ ស្រុកសន្ទុក ខេត្តកំពង់ធំ របួសបាក់ជើង បាក់ដៃ និងគ្រោះថ្នាក់ក្បាលធ្ងន់ធ្ងរ ហើយបានស្លាប់នៅក្នុង មន្ទីរពេទ្យបង្អែក, ទី២៖ឈ្មោះ តន អាយុ៣២ឆ្នាំ រស់នៅភូមិបឹងរាំង ស្រុកកំរៀង ខេត្តបាត់ដំបង របួសបាក់ឆ្អឹងជើងទាំងពីរ បញ្ជូនទៅព្យាបាលនៅមន្ទីរពេទ្យខេត្តបាត់ដំបង, ទី៣៖ឈ្មោះ ធោន កក អាយុ២០ឆ្នាំ រស់នៅស្រុកសន្ទុក ខេត្តកំពង់ធំ (ស្លាប់), ទី៤៖ឈ្មោះ ប្រាក់ ឃឿន អាយុ៣៨ឆ្នាំ រស់នៅខេត្តបន្ទាយមានជ័យ (ស្លាប់) សាកសពជនរងគ្រោះត្រូវបានរក្សាទុកនៅមន្ទីរពេទ្យបង្អែក ខេត្តប៉ៃលិនរងចាំក្រុមគ្រួសារមកទទួលយកទៅធ្វើបុណ្យតាមប្រពៃណី និងទី៥៖ឈ្មោះ បុរី អាយុ២៣ឆ្នាំ រស់នៅស្រុកប្រសាទសំបូរ ខេត្តកំពង់ធំ (ស្លាប់) ។
កម្មករក្នុងការដ្ឋានបានរៀបរាប់ថា នៅព្រឹកមិញនេះ កម្មករចាប់ផ្តើមធ្វើការជាធម្មតា លុះវេលាម៉ោងកើតហេតុខាងលើ មានកម្មករ១ក្រុម មានគ្នា៥នាក់ ឡើងទៅការដ្ឋានជាន់លើ ដោយជិះរ៉តយោង លុះដល់ជាន់ទី៦ ក៏ដាច់ខ្សែររ៉តធ្លាក់មកតែម្តង។
ជុំវិញករណីនេះសមត្ថកិច្ច បានសន្និដ្ឋានថា ករណីគ្រោះថ្នាក់នេះ កើតឡើងបណ្តាលមកពីម្ចាស់ការដ្ឋានសំណង់ មានការធ្វេសប្រហែស និងមិនមានការប្រុងប្រយ័ត្នខ្ពស់ ដោយប្រើប្រាស់រ៉តសម្រាប់កម្មករជិះ ឡើងចុះអាគារខ្ពស់រហូត១២ជាន់ ដែលមិនមានសុវត្ថិភាព។
បច្ចុប្បន្នអាជ្ញាធរខេត្ត និងសមត្ថកិច្ចជំនាញ ដែលដឹកនាំដោយ លោក ផាន់ ចាន់ធុល អភិបាលខេត្ត បានចុះពិនិត្យមើលដល់ទីតាំងការដ្ឋានផ្ទាល់ ហើយសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកជនរងគ្រោះរងរបួសធ្ងន់បញ្ជូនទៅកាន់មន្ទីរពេទ្យបង្អែកខេត្តដើម្បីព្យាបាល និងសង្គ្រោះបន្ទាន់ ៕
