(មណ្ឌលគិរី)៖ មនុស្សពីរនាក់បានស្លាប់ និង១២នាក់រងរបួសធ្ងន់ស្រាល ។ ដោយឡែក បីនាក់ផ្សេងទៀតជាតៃកុងនិងព្រូបានរត់គេចខ្លួនក្រោយគ្រោះថ្នាក់ក្រឡាប់រថយន្តធន់ធំមួយគ្រឿងនៅចំណុចអូរងើយស្ថិតក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង កាលពីវេលាម៉ោង១២និង៣០រំលងអធ្រាត្រឈានចូលថ្ងៃទី៥ខែកញ្ញាឆ្នាំ២០១៨។លោកវរសេនីយ៍ឯក ប៊ូ ប៊ុនឈាត អធិការនគរបាលស្រុកអូររាំង បានឱ្យដឹងថាភ្លាមៗនៃករណីគ្រោះថ្នាក់ចរាចរនេះលោកបានបញ្ជាកម្លាំងចុះអន្តរាគមន៍ជួយសង្គ្រោះភ្លាមដើម្បីដឹកជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។
លោកបន្តថាហេតុការណ៍អាក្រក់នេះបានកើតនៅចំនុចគីឡូម៉ត្រលេខ៩២ ៩៣ ចំណោតក្បាលស្ពានអូរងើយ ស្ថិតនៅភូមិអណ្ដូងក្រឡឹង ឃុំសែនមនោរម្យស្រុកអូររាំង។ រថយន្តជួបហេតុការណ៍ម៉ាក ហ៊ីយ៉ាន់ដាយ ពាក់ស្លាកលេខ ភ្នំពេញ ២C- ៣០៧៥ ដឹកជន្លង់ម្រេចពីស្រុកមេមត់ មកដាំនៅស្រុកពេជ្រាដា ពេលមកដល់ចំនុចខាងលើជាចំណុចចុះចំណោតផ្លូវកោង ឡានប្តូរលេខមិនចូល ក៏ធ្លាក់ចិញ្ចើមផ្លូវខាងស្ដាំក្រឡាប់ដោយខ្លួនឯង ។
លោកបន្ថែមថា អ្នកជិះក្នុងរថយន្ត ចំនួន ១៧នាក់ ប្រុសទាំងអស់ បណ្ដាលឲ្យ ស្លាប់ពីរនាក់ រងរបួសធ្ងន់ស្រាលចំនួន១២នាក់ ពេលបញ្ចូនមកមន្ទីរពេទ្យខេត្តស្លាប់១នាក់ ចំណែកតៃកុងនិងព្រូ បីនាក់រត់បាត់ ។
បច្ចុប្បន្នជនរងគ្រោះបញ្ជូនមកមន្ទីរពេទ្យខេត្តមណ្ឌលគិរី ចំណែកសពជនរងគ្រោះនៅកន្លែងកើតហេតុរង់ចាំគ្រួសារមកទទួលយកទៅធ្វើបុណ្យ ។ ក្នុងចំណោមជនរងគ្រោះស្គាល់អត្តសញ្ញាណចំនួន៤នាក់ ដោយ ទី១ឈ្មោះសេងបែន ប្រុសអាយុ៣០ឆ្នាំ ជនជាតិខ្មែររបួសជើងទាំង២,២ ឈ្មោះស៑យស៊ីជន់ អាយុ៤០ឆ្នាំ បាក់ដៃស្ដាំ ,៣ ឈ្មោះ អា៑ង ចាន់ថែ អាយុ៣៦ឆ្នាំ បែកក្បាលនិង៤ ឈ្មោះ ស៊ុនគឹមសឿន ប្រុសអាយុ៥២ឆ្នាំ របួសស្រាល ។ ចំណែកអ្នកនៅសល់កំពុងស្រាវជ្រាវរកអត្តសញ្ញាណ៕