(ព្រះសីហនុ)៖ នៅរសៀលថ្ងៃទី១៨ ខែ វិច្ឆិកាឆ្នាំ ២០១៨ នេះ លោកឧត្តមសេនីយ៍ត្រី កុល ផាលី ស្នងការរងទទួលផែនព្រហ្មទណ្ឌ តំណាងឲ្យលោកឧត្តមសេនីយ៍ ទោ ជួន ណារិន្ទ ស្នងការនគរបាលខេត្តព្រះសីហនុ បានបង្ហាញមុខជនសង្ស័យចំនួន ៦នាក់ ដែលបានប្រព្រឹត្តបទល្មើសព្រហ្មទណ្ឌ ដោយឡែកពីគ្នា ។
ប្រភពសមត្ថកិច្ចបានអោយដឹងថា ករណីទី១ ជនសង្ស័យ៣នាក់ បានប្រើអំពើហិង្សា បណ្ដាលឲ្យមនុស្សម្នាក់ស្លាប់ ពេលមានជម្លោះក្នុងពេលផឹកស៊ី នៅថ្ងៃទី១៦ ខែវិច្ឆិកា ឆ្នាំ ២០១៨ វេលាម៉ោង២៣:០០ នាទី នៅផ្លូវទៅកោះព្រាប ទំនប់រលកចាស់ សង្កាត់លេខ១ ក្រុងព្រះសីហនុ (ក្បែរស្នាក់ការនគរបាលព្រំដែនទឹក) ។
ជនបង្ករួមមាន ១.ឈ្មោះ ឆាយ ស្រ៊ ភេទប្រុស អាយុ២៤ឆ្នាំ មុខរបរកូនដៃទូកអូរប៊័រ ក្រុមហ៊ុន ស៊ីស៊ីប្លូស៊ី ស្នាក់នៅលើអូរប៊័រ ។ ២.ឈ្មោះ ឆាយ កុងស៊ុន ភេទប្រុស អាយុ២៣ឆ្នាំ មុខរបរកូនដៃ ទូកអរប៊័រ ស៊ីស៊ីប៊្លូស៊ី ស្នាក់នៅលើអូរប៊័រ ។ ៣.ឈ្មោះ ប៊ុន ដារា ភេទប្រុស អាយុ២១ ឆ្នាំ មុខរបរ កូនដៃទូកអូរប៊័រ ស៊ីស៊ីប៊្លូស៊ី ស្នាក់នៅលើអូរប៊័រ ។
សពជនរងគ្រោះឈ្មោះស៊ុន វិច្ឆិកា ភេទប្រុស អាយុ២៨ឆ្នាំ មុខរបរកម្មករទូកអូរប៊័រ ក្រុមហ៊ុនចិន ស្នាក់នៅលើអូរប៊័រ ស្រុកកំណើតនៅភូមិទួលទទឹង ឃុំទួលទទឹង ស្រុកព្រៃនប់ ខេត្តព្រះសីហនុ ។
លោកឧត្តមសេនីយ៍ត្រី កុល ផាលី ស្នងការរង បានបញ្ជាក់ថា៖ រឿងហេតុ ដំបូងជនសង្ស័យទាំង៣នាក់ខាងលើ និង ជនរងគ្រោះ បានផឹកស៊ី ជាមួយគ្នា នៅចិញ្ចើមផ្លូវលើទំនប់រលក ផ្លូវទៅកោះព្រាប ពេលដែលជនរងគ្រោះស្រវឹងជោគជាំ បានទាស់ពាក្យសម្ដីគ្នា ហើយក៏វាយតប់គ្នាតែម្តង បណ្ដាលអោយឈ្មោះ ស៊ុន វិច្ឆិកា (សព) ធ្លាក់ពីលើផ្លូវ បុកថ្ម បែកក្បាល បាក់កស្លាប់តែម្ដង ។ ក្រោយពេលទទួលបានព័ត៌មាននេះភ្លាម នគរបាលមូលដ្ឋាន បានស្រាវជ្រាវចាប់ខ្លួនជនសង្ស័យបានភ្លាមៗ ក្នុងយប់នោះតែម្ដង។
ករណីទី២.ក្រុមចោរលួចកាច់សោរយកម៉ូតូ និង ប្រើប្រាស់អាវុធខុសច្បាប់ ក្លែងបន្លំប្រើប្រាស់ ឯកសណ្ឋាននគរបាលជាតិ ។ ក្រុមនេះមានគ្នា ៣នាក់ ត្រូវបានសមត្ថកិច្ចចាប់ខ្លួនបាន ជាបន្តបន្ទាប់នៅ ថ្ងៃទី១៧ ខែវិច្ឆិកា ឆ្នាំ២០១៨ បន្ទាប់ពីពួកវាលួចបានម៉ូតូ១គ្រឿងម៉ាកហុងដាឌ្រីម២០១៨ ពីក្រុងព្រះសីហនុ ហើយជិះគេចតាមផ្លូវ ស្រុកស្ទឹងហាវ សំដៅទៅផ្លូវជាតិលេខ៤ បំរុងទៅភ្នំពេញ។ លុះមកដល់ចំណុចស្ពានទី៦ ក្នុងឃុំសំរុង ស្រុកព្រៃនប់ ត្រូវសមត្ថកិច្ចស្ទាក់ចាប់បានតែម្តង ។
ជនល្មើសរួមមាន៖ ១.ឈ្មោះចាន់ ពិសិដ្ឋ ឬ សែម ចន្ធូ ភេទប្រុសអាយុ៣០ឆ្នាំ មុខរបរសន្តិសុខឯកជន ក្រុមហ៊ុនLucky មានទីលំនៅភូមិ២០ឧសភា ឃុំស្វាយប៉ោ ស្រុកស្វាយប៉ោ ខេត្តបាត់ដំបង ។ ២.ឈ្មោះឈឺន ពេជ្រ ភេទប្រុសអាយុ៣៦ឆ្នាំមុខរបរអ្នកបើកបរ មានទីលំនៅភូមិព្រែកតាទាន់ ឃុំព្រែកតាស្តេច ស្រុកស្វាយប៉ោខេត្តបាត់ដំបង។
ក្រោយពេលសាកសួរ សមត្ថកិច្ចបានទៅចាប់ខ្លួនគ្នាវាម្នាក់ទៀតឈ្មោះគឹម សុផានិត ភេទប្រុសអាយុ២៣ឆ្នាំ មុខរបរមិនពិតប្រាកដក្លែងឯកសណ្ឋាននគរបាលជាតិ និងកាន់កាប់ប្រើប្រាស់អាវុធខុសច្បាប់ ។ ដកហូតបានអាវុធរ៉ូឡូមួយដើម មានគ្រាប់២ វិទ្យុទាក់ទងមួយគ្រឿង ប្រដាប់កាច់កម៉ូតូមួយចំនួន និងអាវឯកសណ្ឋាននគរបាលជាតិមួយ និងម៉ូតូជាផលនៃ អំពើលួច ចំនួន ២គ្រឿង។
ជនសង្ស័យទាំងពីរក្រុមខាងលើសមត្ថកិច្ចជំនាញបានកសាងសំណុំរឿងតាមនីតិវិធីបញ្ជូន ទៅសាលាដំបូងខេត្តព្រះសីហនុ ដើម្បី ចាត់ការតាមច្បាប់ ៕
