(ព្រះសីហនុ)៖ នគរបាលខេត្តព្រះសីហនុចាប់ផ្តើមលេងធម៌ក្តៅឃាត់រថយន្តដឹកដីចេញចូល ក្រុមហ៊ុនសំណង់ចិន បែកភក់ប្រឡាក់ថ្នល់ ឲ្យលាងសម្អាតថ្នល់ឡើងវិញ និងឃាត់បណ្តោះអាសន្ន មិនឲ្យធ្វើចរាចរ ។
លោកឧត្តមសេនីយ៍ត្រី អ៊ី សុខា ស្នងការរងទទួលផែនសណ្ដាប់ធ្នាប់ចរាចរណ៍ បានឲ្យដឹងថាៈ នៅព្រឹកថ្ងៃទី២០ ខែវិច្ឆិកា ឆ្នាំ២០១៨ នេះកំលាំងសមត្ថកិច្ចនគរបាលចរាចរណ៍ផ្លូវគោកខេត្តព្រះសីហនុ បានឃាត់រថយន្តដឹកដី ចេញចូល ក្រុមហ៊ុនសំណង់ចិនមួយកន្លែង នៅជិតវេទិកាបុណ្យជាតិ៧មករា ក្បែរសួនច្បារ រូបសំណាក់កូនសោរសេដ្ឋកិច្ច ស្ថិតក្នុងសង្កាត់លេខ៣ ក្រុងព្រះសីហនុ ដោយបានបង្គាប់ឲ្យក្រុមហ៊ុនសំណង់ចិន ធ្វើការបាញ់ទឹកលាងសម្អាតថ្នល់ ឲ្យស្អាតឡើងវិញ ហើយចាប់រថយន្តដឹកដីចំនួន៦គ្រឿង ដែលធ្លាក់ដីប្រឡាក់ផ្លូវ យកមករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីអប់រំណែនាំ ឲ្យធ្វើកិច្ចសន្យា ផ្អាកការធ្វើចរាចរមួយរយៈខ្លីផងដែរ ។
ជុំវិញសកម្មភាពនេះប្រជាពលរដ្ឋនៅក្រុងព្រះសីហនុបានសំដែងនូវការសាទរ និងគាំទ្ររពេញទំហឹងចំពោះសមត្ថកិច្ចនគរបាលខេត្តព្រះសីហនុ និងសំនូមពរអោយកំលាំងសមត្ថកិច្ចបន្តសកម្មភាពនេះជាបន្តទៀតផងដែរ ៕
