ក្នុងពេលអញ្ជើញជួបសំណេះសំណាលការងារជាមួយលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅថ្ងៃទី២៩ ខែមិថុនា ឆ្នាំ២០១៧ ឯកអគ្គរដ្ឋទូតអូស្ត្រាលីប្រចាំនៅកម្ពុជា លោកស្រី អែនជែលឡា ខកខូរិន (Angela Corcoran) បានថ្លែងថា ប្រទេសអូស្ត្រាលី មានការតាំងចិត្តខ្ពស់ក្នុងការពង្រឹងទំនាក់ទំនងពាណិជ្ជកម្ម និងវិនិយោគជាមួយកម្ពុជា។ លោកស្រីឯកអគ្គរដ្ឋទូត បានបន្តថា ដើម្បីពង្រឹងទំនាក់ទំនងពាណិជ្ជកម្ម និងវិនិយោគ នៅពេលថ្មីៗនេះ លោកស្រី បានជួបពិភាក្សាជាមួយក្រសួងការបរទេស និងសហប្រតិបត្តិការអន្តរជាតិ ក្នុងការរៀបចំកិច្ចប្រជុំមន្ត្រីជាន់ខ្ពស់មួយស្ដីពីពាណិជ្ជកម្ម និងវិនិយោគ ដើម្បីបន្តពង្រឹងកិច្ចសហប្រតិបត្តិការរវាងកម្ពុជា និងអូស្ត្រាលី។លោកស្រី ឯកអគ្គរដ្ឋទូតអូស្ត្រាលី បានឲ្យដឹងទៀតថា ព្រឹត្តិការណ៍ទី២គឺកិច្ចប្រជុំកំពូលលើកទីមួយ អាស៊ាន-អូស្ត្រាលី ដែលនឹងប្រព្រឹត្តទៅនៅទីក្រុងស៊ីដនី ក្នុងឆ្នាំ២០១៨។ កិច្ចប្រជុំនេះនឹងមានការចូលរួមពីលោកនាយករដ្ឋមន្ត្រី ហ៊ុន សែនផងដែរ។រដ្ឋមន្រ្តីក្រសួងពាណិជ្ជកម្ម ក៏បានថ្លែងអំណរអរគុណចំពោះការអញ្ជើញរបស់លោកស្រី ហើយបានថ្លែងថា ព្រឹត្តិការណ៍ទាំងនោះ មានសារៈសំខាន់សម្រាប់ប្រទេសទាំងពីរ ជាពិសេសដើម្បីពង្រឹងកិច្ចសហប្រតិបត្តិការរវាងកម្ពុជា និងអូស្ត្រាលី។ ម្យ៉ាងវិញទៀត ជាឱកាសមួយដើម្បីឲ្យវិស័យឯកជនរបស់ប្រទេសទាំងពីរបានជួបគ្នា និងសហការជាមួយគ្នា៕
