ភ្នំពេញ៖ ជំនួយការឧកញ៉ា អឹង ប៊ុនហូវ ត្រូវបុគ្គលិកអាកាសយានដ្ឋានអន្តរជាតិភ្នំពេញ កាប់រយះក្បាល រងរបួសធ្ងន់ ខណៈជនរងគ្រោះទៅទទួលលោកឧកញ៉ានៅព្រលានយន្តហោះ កាលពីព្រឹកម្សិញមិលញ។អធិការនគរបាលខណ្ឌពោធិ៍សែនជ័យ លោក យឹម សារ៉ាន់ បានប្រាប់ អ្នកសារព័ត៌មាន ថា ជំនួយការឧកញ៉ា អឹង ប៊ុនហូវ ឈ្មោះ កែវ ស៊ីថា ភេទប្រុស អាយុ៥០ឆ្នាំ នៅវេលាម៉ោងជាង៨ព្រឹក ថ្ងៃទី៦ ខែកក្កដា ឆ្នាំ២០១៧នេះ ត្រូវជនសង្ស័យឈ្មោះ កែវ ភារម្យ អាយុ២៥ឆ្នាំ ស្នាក់ផ្ទះលេខ១៨UH ផ្លូវលេខK៤A សង្កាត់ទឹកថ្លា មុខរបរអ្នកទទួលភ្ញៀវ នៅអាកាសយានដ្ឋានអន្តរជាតិភ្នំពេញ យកកាំបិតបុ័ងតោ ដេញកាប់ក្នុងព្រលាន បណ្តាលឲ្យរយះក្បាល ឈាមហូរស្រោចពេញខ្លួន។បើតាមលោកអធិការ មូលហេតុដែលបណ្តាលជនសង្ស័យកាប់ទៅលើជនរងគ្រោះ ដោយសារតែជនសង្ស័យប្រតិកម្មថ្នាំញៀនសាជាថ្មី ពោល គឺជនសង្ស័យជាមនុស្សញៀនថ្នាំ ហើយធ្លាប់ជាប់នៅមណ្ឌលបន្សាបគ្រឿងញៀនក្រាំងធ្នង់ទៀតផង។លោក យឹម សារ៉ាន់ បញ្ជាក់ថា នៅព្រឹកមិញនេះ ជំនួយការឧកញ៉ា អឹង ប៊ុនហូវ បានទៅទទួលលោកឧកញ៉ានៅព្រលានយន្តហោះ គ្រានោះស្រាប់តែជនសង្ស័យ បានស្ទុះទៅកាប់ជាច្រើនកាបិត បណ្តាលឲ្យរងរបួសធ្ងន់ផ្នែកក្បាល ដោយជនសង្ស័យមានកាំបិតបុ័ងតោលាក់ទុកជាស្រេចនៅក្នុងកាបូប។ ករណីបុគ្គលិកព្រលានយន្តហោះ ញៀនថ្នាំដែលទើបនឹងចូលធ្វើការ ហើយដេញកាប់មនុស្សនេះ បានបង្កឲ្យមានការភ្ញាក់ផ្អើលជាខ្លាំងដល់អ្នកដំណើរ និងភ្ញៀវជាតិអន្តរជាតិ បន្ទាប់មកសមត្ថកិច្ចក៏បានចុះទៅដល់ និងចាប់ខ្លួនតែម្តង។បច្ចុប្បន្ន ជនសង្ស័យ ស្ថិតក្នុងការឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ រង់ចាំកសាងសំណុំរឿងបញ្ជូនទៅតុលាការ ចាត់ការតាមច្បាប់៕
