ហេតុការណ៏គួរអោយសង្វេកនេះ កើតឡើងនៅថ្ងៃទី០១ ខែសីហា ឆ្នាំ២០១៧ វេលាម៉ោង០៩ និង០០នាទី នៅចំណុចរោងចិញ្ចឹមមាន់ នៅខាងត្បូងចុងភូមិអណ្ដូង ឃុំក្រាំងយ៉ូវ ស្រុកស្អាង ខេត្តកណ្តាល ។ជនរងគ្រោះឈ្មោះ សុខរិន សុខរ័ត្ន ភេទប្រុស អាយុ១១ឆ្នាំ ជនជាតិខ្មែរ មានទីលំនៅភូមិអណ្តូង ឃុំក្រាំងយ៉ូវ ស្រុកស្អាង ខេត្តកណ្ដាល ។សមត្ថកិច្ចបានអោយដឹងថា នៅថ្ងៃទី០១ ខែសីហា ឆ្នាំ២០១៧ វេលាម៉ោង០៧ និង៣០នាទី ឈ្មោះ សុខរិន សុខរ័ត្ន(ជនរងគ្រោះ)ទៅឃ្វាលគោនៅចុងភូមិអណ្ដូង។ ពេលចងគោឲ្យស៊ីស្មៅរួចរាល់ហើយ ឈ្មោះ សុខរិន សុខរ័ត្ន បានទៅលេងនៅខាងក្រោមរោងចិញ្ចឹមមាន់របស់ ឈ្មោះ ផេង គង់ ដែលទុកចោលយូរមកហើយ។ នៅទីនោះមានខ្សែរចងថ្ពក់អង្រឹងដែលគេចងទុកចោល ពេលឈ្មោះ សុខរិន សុខរ័ត្ន បានយកធុងនំចិន (ធ្វើពីដែកស័ង្កសី)ដាក់ខាងក្រោមខ្សែរថ្ពក់អង្រឹងនោះ ហើយយកក្បាលទៅស៊កចូលក្នុងប្រហោងខ្សែរ យកដៃកាន់ខ្សែរយោគលេងៗ ក៏ក្រឡាច់ជើងធ្លាក់ពីលើធុងនំបណ្ដាលឲ្យទាក់កនៅជាប់នឹងខ្សែថ្ពក់អង្រឹងនោះ បណ្ដាលអោយ ស្លាប់តែម្ដង។សមត្ថកិច្ចបន្តថា បន្ទាប់ពីទទួលបានដំណឹងពីករណីខាងលើភ្លាម កំលាំងសមត្ថកិច្ចយើងបានទៅដល់កន្លែងកើតហេតុ ដោយមានការចូលរួមពីកម្លាំងជំនាញពិនិត្យហេតុស្រុកស្អាង ក្រុមប្រឹក្សាឃុំ កម្លាំងប៉ុស្តិ៍ក្រាំងយ៉ូវ មេភូមិអណ្ដូង ពេទ្យ មណ្ឌលសុខភាព និងក្រុមគ្រួសារបានពិនិត្យសពឃើញថា ពិតជាបានស្លាប់ ថ្ពក់នឹងខ្សែរអង្រឹងតែម្ដង។ ក្រៅពីស្លាកស្នាមត្រង់ក មិនមានស្លាកស្នាមផ្សេងទៀត នៅលើសាកសពឡើយ។ក្រោយពីធ្វើការពិនិត្យរួច សព ត្រូវបានប្រគល់ជូនគ្រួសាររៀបចំធ្វើបុណ្យតាមប្រពៃណី៕
