រាជធានីភ្នំពេញ ៖ នារីវ័យក្មេងម្នាក់ជិតដល់ថ្ងៃរៀបការទៅហើយត្រូវបានជនសង្ស័យលួងលោមទៅរំលោភក្នុងផ្ទះសំណាក់រួចយកខ្សែកង្ហាររឹតកសម្លាប់នៅក្នុងបន្ទប់ផ្ទះសំណាក់ មុនីកាស្ថិតនៅតាមផ្លូវ៤៦០ ក្រុម២២ ភូមិ៤ សង្កាត់ទួលទំពូង១ ខណ្ឌចំការមន បង្កឲ្យមានការភ្ញាក់ផ្អើលកាលពីវេលាម៉ោង០៧យប់ ថ្ងៃម្សិលមិញ។សពជនរងគ្រោះមានឈ្មោះ អ៊ី សុខា ភេទស្រី អាយុ២៦ឆ្នាំ មុខរបរដេរខោអាវនៅផ្ទះ ស្នាក់ភូមិកោះនរា សង្កាត់និរោធ ខណ្ឌច្បារអំពៅ មានឪពុកឈ្មោះ អ៊ី ធារ៉ា អាយុ៥៩ឆ្នាំ មុខរបរយោធា ជាជនជាតិខ្មែរ មានម្ដាយឈ្មោះ ហៀង សុខលី អាយុ៤៦ឆ្នាំ មុខរបរកាត់ដេរសំលៀកបំពាក់នៅផ្ទះ ជាជនជាតិវៀតណាម ។ម៉ូតូដែលជនសង្ស័យប្លន់យកទៅបាត់ម៉ាក ហុងដាឌ្រីម ស៊េរី២០១៦ ពណ៌ខ្មៅ ពាក់ស្លាកលេខ ភ្នំពេញ ១FT-១៧២៣ និងលុយចំនួន៤០ដុល្លារ ។តាមសម្ដីឪពុករបស់ជនរងគ្រោះបានឲ្យដឹងថា ៖ មុនពេលកើតហេតុ នៅវេលាម៉ោង០៩ព្រឹក ថ្ងៃទី០២ ខែសីហា ឆ្នាំ២០១៧ កូនស្រីរបស់គាត់ជាជនរងគ្រោះបានសុំម្តាយចេញពីផ្ទះទៅផ្សារច្បារអំពៅដោយជិះម៉ូតូហុងដាឌ្រីម ស៊េរី២០១៦ ពេលម្តាយលឺថាកូនស្រីទៅផ្សារ ក៏បានផ្ញើលុយចំនួន៤០ដុល្លារឲ្យកូនយកទៅដូរយកប្រាក់រៀលទុកឲ្យអាប់ឲ្យភ្ញៀវ ។ប្រភពដដែលបានបន្តទៀតថា ៖ រហូតដល់ថ្ងៃត្រង់ មិនឃើញកូនស្រីត្រឡប់មកវិញ ពួកគាត់ជាឪពុកម្តាយ បានចាំមើលផ្លូវកូនចាំបាត់ៗ ទូរស័ព្ទក៏តេមិនចូល មិនដឹងថា កូនទៅទីណានោះទេ លុះម៉ោងកើតហេតុ រូបគាត់ជាឪពុក បានទូរស័ព្ទទៅកូនម្តងទៀត ក៏ស្រាប់តែសមត្ថកិច្ចប្រាប់ថា កូនរបស់គាត់ត្រូវបានគេសម្លាប់ក្នុងផ្ទះសំណាក់មុនីកា លឺដូចនេះរូបគាត់បានទៅដល់ផ្ទះសំណាក់ ដើម្បីពិនិត្យមើល ឃើញថាជាកូនរបស់គាត់ពិតមែន ប៉ុន្តែម៉ូតូ និងប្រាក់៤០ដុល្លារ បានបាត់អស់ហើយ ។ក្រុមគ្រួសាររបស់ជនរងគ្រោះបានបង្ហើបថា៖ កូនស្រីរបស់គាត់មានគូដណ្តឹងនៅខេត្តក្រចេះនឹងត្រូវចូលរោងការនៅខែធ្នូ ឆ្នាំ២០១៧ ខាងមុខនេះហើយ។កន្លងមកកូនស្រីរបស់គាត់ មិនដែលចេញពីផ្ទះទេ នៅតែផ្ទះដេរខោអាវជាមួយម្តាយតែប៉ុណ្ណោះហើយគាត់ក៏មិនបានដឹងថាកូនស្រីមានទំនាក់ទំនងស្នេហាជាមួយជនសង្ស័យជាឃាតករតាំងពីពេលណាមកទេ ។សមត្ថកិច្ចបានឲ្យដឹងថា ៖ នៅវេលាម៉ោង០៩ព្រឹក ថ្ងៃកើតហេតុមានបុរសជាជនសង្ស័យម្នាក់ បានទៅជួលបន្ទប់ផ្ទះសំណាក់ មុនីកា ស្នាក់នៅបន្ទប់លេខ៣២ ដោយបានប្រាប់ម្ចាស់ផ្ទះសំណាក់ថា ជួលពេញមួយថ្ងៃ។បន្ទាប់ពីជួលផ្ទះសំណាក់រួចហើយជនសង្ស័យបានឡើងទៅក្នុងបន្ទប់មុនទើបឃើញជនរងគ្រោះមកតាមក្រោយឡើងទៅបន្ទប់លេខ៣២ បានមួយសន្ទុះក្រោយមកស្រាប់តែឃើញជនសង្ស័យចុះមកតែម្នាក់ឯង ធ្វើឲ្យមេការផ្ទះសំណាក់ឆ្ងល់ ក៏សួរនាំថា ចេញហើយ ឬនៅតែជនសង្ស័យបានតបថា នៅទេ គាត់ចេញទៅក្រៅមួយភ្លែតរួចហើយក៏ជិះម៉ូតូរបស់ជនរងគ្រោះចេញទៅបាត់រហូត ។លុះដល់ម៉ោងជាង០៣រសៀលថ្ងៃដដែលបុគ្គលិកអនាម័យផ្ទះសំណាក់បានលឺសូរសំលេងស្រែកបន្តិចចេញពីក្នុងបន្ទប់លេខ៣២ ក៏បានហៅមេការទៅចាក់សោបន្ទប់មើល ឃើញជនរងគ្រោះអង្គុយផ្អែកនឹងជញ្ជាំងមានខ្សែកង្ហារចង.ករឹតកស្លាប់បាត់ទៅហើយ ។ នៅវេលាម៉ោង០៦ល្ងាច ថ្ងៃកើតហេតុ ម្ចាស់ផ្ទះសំណាក់បានទូរស័ព្ទរាយការណ៍ទៅសមត្ថកិច្ច ឲ្យចុះមកកន្លែងកើតហេតុ ដើម្បីពិនិត្យនៅក្នុងបន្ទប់ផ្ទះសំណាក់ ។សមត្ថកិច្ចបានឲ្យដឹងទៀតថា ៖ តាមការពិនិត្យជាក់ស្តែង នៅក្នុងបន្ទប់កើតហេតុ ជនសង្ស័យបានប្រើប្រាស់ស្រោមអនាម័យអស់ចំនួន២ ។ សមត្ថកិច្ចបានសន្និដ្ឋានថា ជនសង្ស័យលួងលោមជនរងគ្រោះមកជួបនៅផ្ទះសំណាក់រំលោភចំនួន២ដង រួចយកខ្សែកង្ហាររឹត.កសម្លាប់ ប្លន់យកម៉ូតូហុងដាឌ្រីម និងប្រាក់ចំនួន៤០ដុល្លារ។ទោះបីជាយ៉ាងណាម្ចាស់ផ្ទះសំណាក់ព្យាយាមលាក់លៀមមិនអនុញ្ញាតិឲ្យអ្នកយកព័ត៌មាន ថតរូបភាពទេ ។ ក្រោយពេលកើតហេតុសពជនរងគ្រោះត្រូវបានសាច់ញាតិយកទៅធ្វើបុណ្យនៅឯផ្ទះតាមប្រពៃណី ។ ករណីឃាតកម្មរំលោភហើយរឹត.កសម្លាប់ក្នុងបន្ទប់ផ្ទះសំណាក់នេះសមត្ថកិច្ចកំពុងតែស្រាវជ្រាវតាមចាប់ខ្លួនជនសង្ស័យយកមកផ្តន្ទាទោសទៅតាមផ្លូវច្បាប់ ៕
