ភ្នំពេញ៖ យុវតីដ៏ស្រស់ស្អាតវ័យ២១ឆ្នាំម្នាក់បានបាក់ចិត្តលង់ស្នេហ៍បុរសម្នាក់ដោយសារពាក្យផ្អែមល្ហែមលួងលោមថា នឹងយកនាងជាគូអនាគតទីបំផុតនាងក៏លង់ខ្លួនបូជាប្រាណអស់រយៈពេល៥ឆ្នាំតែប្រុសសង្ហាហាក់ធ្វើព្រងើយកន្តើយ មិនរៀបការឬសែនព្រេនអ្វីដើម្បីយករូបនាងជាភរិយាពេញមុខមាត់ឡើយ ទើបធ្វើឲ្យនាងមិនអាចទ្រាំបាន ក៏អូស.ក ប្រុសបោកឡើងសាលាសង្កាត់ ដើម្បីដោះស្រាយគ្នាតាមច្បាប់។ នារីរងគ្រោះរឿងស្នេហានោះមានឈ្មោះ សាន់ ចាន់ដា អាយុ២១ឆ្នាំ ជាកម្មការិនីរោងចក្រកាត់ដេរ ស្នាក់នៅបន្ទប់ជួលក្នុង ភូមិអូរដឹម សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកសន្ទុក ខេត្តកំពង់ធំ។ ចំណែកភាគីខាងប្រុសដែលចង់ដោះដៃចោលគូស្នេហ៍ មានឈ្មោះ ភឿន សិទ្ធ អាយុ២២ឆ្នាំ អតីតកម្មកររោងចក្រជាមួយគ្នា បច្ចុប្បន្នប្រកបរបរលក់ក្រួចអាំង ស្នាក់នៅម្តុំផ្សារអូរដឹម សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកបារាយណ៍ ខេត្តកំពង់ធំ។ នាងចានដា បានប្រាប់ថានាងស្រឡាញ់គ្នាជួយបុរសកំហូចនោះអស់៥ឆ្នាំហើយ ពីដំបូងបានស្គាល់គ្នាខណៈពេលធ្វើការក្នុងរោងចក្រជាមួយគ្នា ក្រោយមកក៏មានទំនាក់ទំនងស្នេហានឹងគ្នា រហូតឈានដល់ការប្រគល់ខ្លួនប្រាណនិងព្រហ្មចារីឲ្យប្រុសស្នេហ៍ដើម្បីបញ្ជាក់ទឹកចិត្តស្នេហ៍ស្មោះចំពោះប្រុសស្នេហ៍ខ្លួន។ តែមិននឹកស្មានថាក្រោយពេលឆ្អែតឆ្អន់ហើយ ប្រុសស្នេហ៍កំហូចចង់ដោះដៃ ហាក់ធ្វើព្រងើយ តោះតើយ មិនចង់ទទួលខុសត្រូវពាក្យដែលខ្លួនធ្លាប់សន្យាថា នឹងរៀបការជាប្ដីប្រពន្ធនឹងគ្នា។ ក្រោយមកខាងប្រុសក៏បានលាឈប់ពីការងារក្នុងរោងចក្រ ហើយឈប់រស់នៅនឹងបន្ទប់ជួលចាស់គេចមុខពីនាង ហើយមកប្រកបរបររកស៊ីលក់ក្រួចអាំង។ លុះដល់ថ្ងៃខែឆ្នាំខាងលើទើបនាងប្រទះឃើញខាងប្រុសកំពុងលក់ក្រួចអាំងនៅម្ដុំផ្សារអូរដឹម ក៏នាំគ្នាអូស.ក ចូលសាលាសង្កាត់ដើម្បីដោះស្រាយតាមច្បាប់។ចំណែកសាមីខ្លួនខាងប្រុសបានឲ្យដឹងថា ពួកគេគ្រាន់តែស្រឡាញ់គ្នាធម្មតា មិនដល់ថ្នាក់ស៊ីជម្រៅបានខ្លួនប្រាណឬព្រហ្មចារីអ្វីឡើយ។ តែសម្ដីខាងប្រុសនេះត្រូវភាគីខាងស្រីច្រានចោលទាំងស្រុង ហើយថាវាគ្រាន់តែជាការដោះសាយករួចខ្លួនរបស់ភាគីខាងប្រុសប៉ុណ្ណោះ។ ភាគីខាងស្រីបានបន្តថា បំណាច់លះបង់ទាំងកាយទាំងចិត្តអស់រយៈពេល៥ឆ្នាំហើយ ខាងប្រុសមិនអាចដោះដៃបានដោយងាយៗនោះឡើយ។ នេះជាពាក្យសម្ដីដែលពួកគេប្រកែកគ្នា នៅមុខសាលាសង្កាត់មុនចូលដោះស្រាយ ប៉ុន្តែលទ្ធផលយ៉ាងណានៅមិនទាន់ដឹងនៅឡើយទេ ៕
