(ម៉ូស្គូ)៖ ក្នុងអំឡុងពេលមួយសប្តាហ៍ នៃការធ្វើប្រតិបត្តិការយោធានៅប្រទេសស៊ីរី កងយន្តហោះចម្បាំងរុស្ស៊ី ត្រូវគេរាយការណ៍ថា បានកម្ទេចសម្ភារៈជាង ១,២៥០គ្រឿង ដែលជារបស់ក្រុមសកម្មប្រយុទ្ធ ISIS។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នៅព្រឹកថ្ងៃសុក្រ ទី១៧ ខែវិច្ឆិកា ឆ្នាំ២០១៧។
យោងតាមសារព័ត៌មាន Red Star ដែលមានទំនាក់ទំនងនឹងក្រសួងការពារជាតិរុស្ស៊ី យន្តហោះចម្បាំងរុស្ស៊ី បានចេញប្រតិបត្តិការច្រើនជាង ៥០០លើក ដើម្បីតាមស្វែងរក និងវាយប្រហារទៅលើគោលដៅនៃក្រុម ISIS។ ម៉្យាងវិញទៀត ក្នុងអំឡុងពេលដូចគ្នានេះ យន្តហោះដ្រូនរបស់រុស្ស៊ី បានបំពេញបេសកកម្មហោះស៊ើបការណ៍ជាង ៣០០លើក និងរកឃើញគោលដៅ ISIS ចំនួន ៤៣២ ខណៈអង្គភាពដោះគ្រាប់បែករុស្ស៊ីនៅលើដីវិញ បានប្រទះឃើញ និងកម្ទេចចោលនូវគ្រឿងផ្ទុះប្រមាណ ៤៥,០០០គ្រឿង។
គួរជម្រាមថា រុស្ស៊ីបានបើកយុទ្ធនាការយោធារបស់ខ្លួន នៅក្នុងប្រទេសអារ៉ាប់មួយនេះ កាលពីថ្ងៃទី៣០ ខែកញ្ញា ឆ្នាំ២០១៥ តបតាមការស្នើសុំពីសំណាក់រដ្ឋាភិបាលស៊ីរី៕
