(ភ្នំពេញ)៖ អបអរសាទរសិស្សកម្ពុជា ៤នាក់ ទទួលបានមេដាយ៩គ្រឿង ពីកម្មវិធីប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូកបី លើកទី៧ នៅទីក្រុងកូឡាឡាំពួរ ប្រទេសម៉ាឡេស៊ី ក្រោមប្រធានបទ “វិទ្យាសាស្ត្រ និងការបង្កើតថ្មីដើម្បីសុខភាព និងសុខុមាលភាពសង្គម” ក្នុងនោះមេដាយមាស ១ គ្រឿង មេដាយប្រាក់១គ្រឿង និងមេដាយសំរឹទ្ធ៧គ្រឿង នេះបើតាមការបញ្ជាក់របស់ក្រសួងអប់រំយុវជន និងកីឡា នៅថ្ងៃទី០៣ ខែសីហា ឆ្នាំ២០១៨នេះ ។ ក្រសួងបានបញ្ជាក់អោយដឹងថាយុវសិស្សដែលទទួលបានមេដាយទាំងនោះរួមមាន ៖១. យុវសិស្ស អៀង ហ៊ុយឃាង ភេទប្រុស វិទ្យាល័យព្រះមុនីវង្ស ខេត្តបាត់ដំបង មេដាយមាស ១គ្រឿង ។ ២.យុវសិស្ស ឡី ឡាយអាន ភេទប្រុស សាលាអន្តរជាតិឌូវី ខេត្តបាត់ដំបង មេដាយប្រាក់ ១គ្រឿង និងមេដាយសំរឹទ្ធ២គ្រឿង ។ ៣.យុវសិស្ស ស្រ៊ុន រដ្ឋា ភេទប្រុស វិទ្យាល័យហ៊ុនសែន១មិថុនា ខេត្តតាកែវ មេដាយសំរឹទ្ធ៣គ្រឿង។ ៤.យុវសិស្ស ពេជ្ជ ពុធស្រីនាថ ភេទស្រី វិទ្យាល័យព្រះបាទសុរាម្រិត ខេត្តកំពង់ឆ្នាំង មេដាយសំរឹទ្ធ២គ្រឿង។
គួរបញ្ជាក់ថា មហោស្រពវិទ្យាសាស្ដ្រអាស៊ានបូកបី (APT JSO) គឺជាព្រឹត្តិការណ៍អប់រំប្រចាំឆ្នាំ នៅក្នុងវិស័យវិទ្យាសាស្ត្រ និងបច្ចេកវិទ្យាសម្រាប់ទេពកោសល្យវ័យក្មេងដែលមានអាយុចន្លោះពី ១៣ ទៅ ១៥ ឆ្នាំ។មហាសន្និបាតអាស៊ានលើកទី៧ (APT JSO) បានបញ្ចូលនូវវិទ្យាសាស្ត្របច្ចេកវិទ្យានិងការច្នៃប្រឌិត (STI) តាមរយៈ ការរុករកដ៏គួរឱ្យរំភើបដើម្បីចិញ្ចឹមបីបាច់ប្រកួតប្រជែងនិងឈានដល់ចំនុចកំពូលរបស់យុវជនអាស៊ានបូកបី ៕
