មនុស្សស្លាប់កើនដល់៣៥នាក់ ក្នុងហេតុការណ៍បាក់ស្ពាននៅប្រទេសអ៊ីតាលី

(អ៊ីតាលី)៖ ចំនួនមនុស្សស្លាប់បានកើនដល់ ៣៥នាក់ហើយ និងជាច្រើននាក់ទៀតរងរបួស នៅក្នុងហេតុការណ៍បាក់ស្ពានមួយ កន្លែងស្ថិតនៅភាគខាងជើងទីក្រុង Genoa ប្រទេសអ៉ីតាលី។ នេះបើតាមការចេញផ្សាយដោយទីភ្នាក់ងារសារព័ត៌មាន CNN នៅថ្ងៃអង្គារ ទី១៤ ខែសីហា ឆ្នាំ២០១៨ ដោយដកស្រង់ចេញពីការិយាល័យអភិបាលនៃតំបន់ Liguria ភាគពាយ័ព្យ នៃទីក្រុង Genoa ប្រទេសអ៊ីតាលី ។ ការិយាល័យនេះបានប្រកាសវានៅលើគណនី Twitter ផ្លូវការរបស់ខ្លួនដោយដកស្រង់ប្រភពមិនបញ្ចេញឈ្មោះចេញពីនាយកដ្ឋានពន្លត់អគ្គិភ័យ ។

គួរបញ្ជាក់ថា ហេតុការណ៍បាក់ស្ពាននេះបានកើតឡើងនៅម៉ោង ១១៖៣០នាទីព្រឹក ថ្ងៃអង្គារនេះ (ម៉ោងនៅក្នុងតំបន់) និងចំពេលភ្លៀងកំពុងធ្លាក់ខ្លាំង។

ហើយបើតាមប្រព័ន្ធផ្សព្វផ្សាយអ៊ីតាលី ស្ពានខាងលើត្រូវបានកសាងឡើងតាំងតែពីឆ្នាំ១៩៦៣ និងបញ្ចប់នៅឆ្នាំ១៩៦៧មកម្លេះ ហើយរហូតមកដល់ពេលនេះវាមានរយៈកាល ៥១ឆ្នាំមកហើយ ៕