(ភ្នំពេញ)៖ ព្រឹកថ្ងៃទី១៥ ខែសីហា ឆ្នាំ២០១៨ ឯកឧត្តម នាយឧត្ដមសេនីយ៍ ថោង លីម អគ្គស្នងការរងនគរបាលជាតិ និងជាប្រធានក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា តំណាងដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានដឹកនាំកិច្ចប្រជុំត្រួតពិនិត្យបូកសរុបលទ្ធផលការងារប្រចាំត្រីមាសទី២ ឆ្នាំ២០១៨ ជាមួយនាយកដ្ឋាន អង្គភាព ស្នងការដ្ឋាននគរបាលរាជធានី-ខេត្ត រួមជាមួយបណ្ដាស្ថានទូតនានាប្រចាំនៅកម្ពុជា នៅសាលប្រជុំក្រសួងមហាផ្ទៃ។
យោងតាមរបាយការណ៍ត្រីមាសទី២ របស់ក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា បានអោយដឹងថា វិនិយោគិន និងអ្នកទេសចរណ៍បរទេសដែលមកប្រទេសកម្ពុជា បានទទួលរងគ្រោះមានចំនួន ១៧៨ករណី (បើប្រៀបធៀបជាមួយត្រីមាសទី១ មាន១៤១ករណីកើនឡើង ៣៧ករណី) ភាគច្រើនដោយអំពើចោរកម្មលួច-ឆក់មានចំនួន ៧៧ករណី ស្មើនឹង ៤៣,២៥% មាន៣៧សញ្ជាតិ ក្នុងនោះសញ្ជាតិច្រើនជាងគេគឺ ចិន៦១នាក់, វៀតណាម២២នាក់, បារាំង១៤នាក់, អង់គ្លេស១៣នាក់, អូស្ត្រាលី១១នាក់ ហើយភូមិសាស្ត្រដែលកើតមានច្រើនជាងគេគឺនៅរាជធានីភ្នំពេញ ។ ក្រៅពីជនបរទេសរងគ្រោះ ក៏មានជនបរទេសប្រព្រឹត្តបទល្មើសមានចំនួន ៨៨ករណី ឃាត់ខ្លួន៣៧៨នាក់ មាន២៥សញ្ជាតិ (បើប្រៀបធៀបជាមួយត្រីមាសទី២ មាន៥៥ករណី កើនឡើង៣៣ករណី) ភាគច្រើនបទល្មើសប្រើប្រាស់-ជួញដូរគ្រឿងញៀនមានចំនួន ១៧ករណី ស្មើនឹង ១៩,៣១% នៃចំនួនសរុប ៨៨ករណី ក្នុងនោះសញ្ជាតិប្រព្រឹត្តបទល្មើសច្រើនជាងគេគឺ ចិន២៥៧នាក់, នីហ្ស៊េរីយ៉ា៣៧នាក់, វៀតណាម១៤នាក់, ថៃ១២នាក់, កូរ៉ខាងត្បូង០៨នាក់ ហើយភូមិសាស្ត្រដែលកើតមានច្រើនជាងគេគឺនៅរាជធានីភ្នំពេញ ។
ក្រុមព័ត៌មានទាន់ហេតុការណ៍ (HOTLINE) មានទំនាក់ទំនង និងកិច្ចសហប្រតិបត្តិការយ៉ាងល្អជាមួយបណ្តាស្ថានទូត និងស្ថានតំណាងទាំងជំនួបទ្វេភាគី និងពហុភាគី ដើម្បីពិភាក្សាគ្នាដោះស្រាយបញ្ហានានាឲ្យបានទាន់ពេលវេលាទាំងនៅថ្នាក់ជាតិ និងតាមរាជធានី-ខេត្ត រួមទាំងបានការពារគណៈប្រតិភូបរទេស និងមន្ត្រីការទូតបរទេស ក្នុងដំណើរទស្សនកិច្ច និងការចុះបំពេញបេសកកម្មនានា។
ក្នុងកិច្ចប្រជុំនេះ តំណាងពីបណ្ដាស្ថានទូតនានាប្រចាំនៅកម្ពុជា បានចូលរួមប្រជុំស្ដាប់ពីលទ្ធផលការងារប្រចាំត្រីមាសទី២ ឆ្នាំ២០១៨ រួមទាំងពិភាក្សាការងារ និងសំណូមពររបស់បណ្ដាស្ថានទូតនៅកម្ពុជា ។
ថ្លែងក្នុងកិច្ចប្រជុំពិភាក្សាការងារ តំណាងស្ដានទូតប្រចាំនៅកម្ពុជា បានថ្លែងអំណរគុណដល់អគ្គស្នងការដ្ឋាននគរបាលជាតិ ជាពិសេសក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា ដែលបានយកចិត្តទុកដាក់ការពារ និងដោះស្រាយបញ្ហាជូនប្រជាពលរដ្ឋខ្លួន និងការការពារសន្តិសុខ សុវត្ថិភាព ជូនវិនិយោគិន ភ្ញៀវទេសចរណ៍បរទេស មន្ត្រីការទូត ទីតាំងស្ថានទូត និងនិវេសនដ្ឋានឯកអគ្គរាជទូត-រដ្ឋទូត ដែលមានវត្តមាននៅកម្ពុជា ។
ឯកឧត្ដម នាយឧត្ដមសេនីយ៍ ថោង លីម អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក៏បានណែនាំដល់នាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្តជាសមាជិក ត្រូវអនុវត្តតាមផែនការរបស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ អោយមានប្រសិទ្ធិភាពខ្ពស់ក្នុងការការពារសន្តិសុខជូនវិនិយោគិន និងអ្នកទេសចរណ៍បរទេស ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជាក្នុងការទាក់ទាញ និងលើកទឹកចិត្តវិស័យវិនិយោគ និងទេសចរណ៍នៅកម្ពុជា ៕
ប្រភព៖ អគ្គស្នងការដ្ឋាននគរបាលជាតិ
