(ព្រះសីហនុ)៖ ជនជាតិចិនប្រុសស្រី២នាក់ត្រូវនគរបាលចាប់ខ្លួន បន្ទាប់ពីបានឆែកឃើញថ្នាំញៀនជាច្រើនកញ្ចប់នៅក្នុងរថយន្ត ។
លោកឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា៖ នៅរសៀល ថ្ងៃទី២៧ ខែសីហា ឆ្នាំ២០១៨ វេលាម៉ោង១៥:២០ នាទី កម្លាំងចម្រុះ ចុះត្រួតពិនិត្យឆែកឆេររុករកអាវុធជាតិផ្ទុះ តាមដងផ្លូវសាធារណៈ ចំណុចមុខមន្ទីរពេទ្យបង្អែកខេត្តព្រះសីហនុ បានធ្វើការឆែកឆេររថយន្តម៉ាក LEXUS RX 330 មួយគ្រឿង ផ្លាកលេខ ភ្នំពេញ 2AH-9340 ដែលជិះដោយជនជាតិចិន ប្តីប្រពន្ធ២នាក់ បានរកឃើញថ្នាំញៀនជាច្រើនកញ្ចប់ ទុកក្នុងថត ក្បែរប្រអប់លេខ ។ ភ្លាមៗនោះសមត្ថកិច្ចបាននាំខ្លួនជនជាតិចិន និងរថយន្ត មកកាន់ស្នងការដ្ឋាននគរបាលខេត្តព្រះសីហនុ ដើម្បីឆែកឆេរបន្ត ។
លោកឧត្តមសេនីយ៍ស្នងការបានប្រាប់អោយដឹងថាជនសង្ស័យដែលបានឃាត់ខ្លួនរួមមាន៖
១-ឈ្មោះ YANG REN CHEN ភេទប្រុស អាយុ៣២ឆ្នាំ ជនជាតិចិន ស្នាក់នៅសណ្ឋាគារខ្សាច់ស ជាអ្នកបើកបរ (ពំុមានលិខិតឆ្លងដែនជាប់នឹងខ្លួន) ។
២-ឈ្មោះ JIANG LIU YAN ភេទស្រី អាយុ២៦ឆ្នាំ ជនជាតិចិន មុខរបរទេសចរណ៍ ជាអ្នករួមដំណើរ កាន់លិខិតឆ្លងដែនលេខ G61047083 មានសុពលភាព 05.04.2022 ទិដ្ឋាកាលេខ EI 01596117 មានសុពលភាព 21.02.2019 ។
ចំណែកវត្ថុតាងដែលចាប់បានរួមមាន៖ -ម្សៅក្រាមពណ៌សសង្ស័យជាសារធាតុញៀនចំនួន ៤៣កញ្ចប់ (១កញ្ចប់ធំ និង៤២កញ្ចប់តូច ) -បំពង់សារ៉ាងមានពណ៌ក្រហមចំនួន១៤ ដើម -ទូរសព័្ទ ចំនួន ១ គ្រឿង -រថយន្ត ១គ្រឿង ម៉ាក LEXUS 330
ជនសង្ស័យទាំងពីរ រួមនិងវត្ថុតាងសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី ៕