(ព្រះសីហនុ)៖ បុរសជនជាតិចិនម្នាក់ត្រូវសមត្ថកិច្ចឃាត់ខ្លួនពេលមកសុំយករថយន្តទៅវិញនៅបរិវេណក្លិបខារ៉ាអូខេដែលសមត្ថកិច្ចចុះបង្រ្កាបពាក់ព័ន្ធគ្រឿងញៀនកាលពីពេលកន្លងទៅ ។
លោកឧត្តមសេនីយ៍ត្រី ស៊ុន សុផាត ស្នងការរងទទួលផែនប្រឆាំងបទល្មើសបានឲ្យដឹងថា៖ នៅរសៀលថ្ងៃទី២៧ ខែសីហា ឆ្នាំ២០១៨ កន្លងទៅនេះមានបុរសជនជាតិចិនម្នាក់ បានយកឯកសារផ្សេងៗសំគាល់យានយន្តរបស់ខ្លួនមកទំនាក់ទំនងសុំយករថយន្ត ហាយឡែនដឺ ពណ៌ខ្មៅ ផ្លាកលេខព្រះសីហនុ 2C-5768 មួយគ្រឿង ក្នុងចំណោមរថយន្តជាច្រើន ដែលបានឃាត់ទុកក្នុងបរិវេណក្លិបខារ៉ាអូខេស៊ីងតុងហ្វង ពាក់ព័ន្ធទៅនឹងទីតាំងលក់ចែកចាយ ប្រើប្រាស់ថ្នាំញៀន ដែលសមត្ថកិច្ចបានក្រសោបចាប់កាលពីរំលងអធ្រាត្រឈានចូលថ្ងៃទី២៦សីហា ។
បុរសចិននោះអៈអាងថា រថយន្តរបស់គាត់បានផ្ញើទុកនៅទីនោះពុំមានពាក់ព័ន្ធបទល្មើសអ្វីទេ។
លោក ស៊ុន សុផាត ស្នងការរង បានបញ្ជាក់ថា៖ លុះពេលយើងឆែកក្នុងរថយន្តនោះ ស្រាប់តែប្រទះឃើញថ្នាំញៀនជាច្រើន និងជញ្ជីងថ្លឹងថ្នាំញៀនទៀតផង ។ ភ្លាមៗនោះលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាអោយចាប់ដាក់ខ្នោះដៃជនជាតិចិនម្នាក់នោះតែម្ដង គាត់ឈ្មោះ CUI YAN FEI ភេទប្រុស អាយុ ៣៣ឆ្នាំ កាន់លិខិតឆ្លងដែនលេខ EB 5537894 មុខរបរអ្នកជំនួញ ព្រមទាំងចាប់យកបានវត្ថុតាងពាក់ព័ន្ធនឹងថ្នាំញៀនចំនួនចំនួន៤មុខ ៖ ១-ម្សៅក្រាមពណ៌សថ្លា សង្ស័យជាសារធាតុញៀនចំនួន ៤ កញ្ចប់តូច ។ ២-កាហ្វេដែលសង្ស័យជាសារធាតុញៀន ចំនួន២កញ្ចប់។
៣-ជញ្ជីងថ្លឹងចំនួន ១ ។ ៤-ថង់សំរាប់វិចខ្ចប់គ្រឿងញៀនមួយចំនួន ។
តាមការកត់សម្គាល់របស់សមត្ថកិច្ច បុរសជនជាតិចិនម្នាក់នេះជាមុខសញ្ញាមេខ្លោងលក់ថ្នាំញៀនសំខាន់ម្នាក់ ពីព្រោះមានទាំងជញ្ជីងថ្លឹងថ្នាំញៀន ម្យ៉ាងទៀតនៅថ្ងៃដែលចាប់ជនជាតិចិនទាំង៦២នាក់ កាលពីថ្ងៃទី២៦កន្លងទៅនេះ គេសង្កេតឃើញបុរសម្នាក់នេះ មានអារម្មណ៍ច្រាស់ច្រាល នៅមុខស្នងការដ្ឋាននគរបាលខេត្ត សំបើមណាស់។
ករណីនេះកម្លាំងជំនាញកំពុងកសាងសំណុំរឿងតាមនីតិវិធីបញ្ជូនទៅសាលាដំបូងដើម្បីចាត់ការតាមច្បាប់ ៕