(សេអ៊ូល)៖ ប្រទេស កូរ៉េខាងជើង នាថ្ងៃពុធនេះបានប្រកាសបដិសេធចំពោះការចោទប្រកាន់របស់សហរដ្ឋអាមេរិកដែលចោទថាខ្លួនកំពុងអភិវឌ្ឍន៍អាវុធជីវសាស្ត្រ ដោយបានបញ្ជាក់ថា ការចោទប្រកាន់ពីសំណាក់រដ្ឋាភិបាលក្រុង វ៉ាស៊ីនតោន ជាផ្នែកមួយនៃគម្រោងការផ្តួលរំលំរដ្ឋាភិបាលកូរ៉េខាងជើង នេះបើយោងតាមសេចក្តីរាយការណ៍របស់ភ្នាក់ងារសារព័ត៌មាន Yonhap News ចេញផ្សាយនៅថ្ងៃទី២០ ខែធ្នូ ឆ្នាំ២០១៧នេះ។
«ប្រទេសកូរ៉េខាងជើង ក្នុងនាមជាប្រទេសហត្ថលេខីនៃអនុសញ្ញាហាមឃាត់អាវុធជីវសាស្ត្រ (BWC) បានរក្សាជំហររបស់ខ្លួន ក្នុងការប្រឆាំងរាល់ការអភិវឌ្ឍន៍ ការផលិត ការរក្សាទុក និងការកាន់កាប់អាវុធជីវសាស្ត្រជាដាច់ខាត» នេះជាការលើកឡើងរបស់រដ្ឋមន្ត្រីការបរទេសកូរ៉េខាងជើង ដកស្រង់ដោយសារព័ត៌មាន KCNA។
ក្នុងសេចក្តីថ្លែងការណ៍នេះ ក៏បានបញ្ជាក់ផងដែរថា «ដរាបណាសហរដ្ឋអាមេរិកកាន់តែប្រឆាំងនឹងប្រទេសកូរ៉េខាងជើង ដរាបនោះការប្តេជ្ញារបស់យោធា និងប្រជាពលរដ្ឋកូរ៉េខាងជើង ដើម្បីសងសឹកសហរដ្ឋអាមេរិកក៏កាន់តែរឹងមាំដូចគ្នា»។
កាលពីថ្ងៃចន្ទកន្លងទៅនេះ រដ្ឋាភិបាលរបស់លោក ត្រាំ បានចេញផ្សាយកាលពីថ្ងៃចន្ទកន្លងទៅនេះថា កូរ៉េខាងជើង កំពុងជំរុញការផលិតអាវុធគីមី និងជីវសាស្ត្រ ដែលអាចនឹងបំពាក់ជាមួយនឹងគ្រាប់មីស៊ីល។ សូមជម្រាបថា ប្រទេសកូរ៉េខាងជើង បានក្លាយជាប្រទេសហត្ថលេខីនៃអនុសញ្ញា BWC ក្នុងឆ្នាំ១៩៨៧៕
